Nishu Mane

Nishu's India, 09 - ೩

2009-12-16T16:38:00.005-05:00

ಬಸವನ ಗುಡಿ ಪಾರ್ಕ್ ಸರ್ಕೀಟು :

ಅಮ್ಮಾ...ಹೀಗೆ ತಿರ್‍ಕ್ಕೊಂಡು ಜಾರ್‍ಲಾ?

ನೋ?...ಹೀಗೇ ಬರ್‍ಬೇ್ಕಾ..?

ಓ......ಕೇ.....

ಕ್ಯಾನ್ ಯೂ ಸೀ ಮೀ...ಅಮ್ಮಾ?

ಈಗ್ನೋಡು ಎಲ್ಲಿದೀನಿ....

ತಾತನ ಜೊತೆ ಜೋಕಾಲಿ

ಈ ತಾತನ ಹೆಸ್ರು ಡಿ.ವಿ.ಗುಂಡಪ್ಪ ಅಂತೆ.

ಇವ್ರು ಮಾತ್ರ ಯಾವಾಗ್ಲೂ ಈ ಪಾರ್ಕಲ್ಲೇ ಇರ್ಬೋದಂತೆ!
ನಾನ್ ಮಾತ್ರ ಮನೇಗ್ ಹೋಗ್ಬೇಕಂತೆ......
ನಾಟ್ ಫೇರ್ ಅಮ್ಮಾ.

Nishu's India 09 - ೨

2009-12-01T18:43:00.004-05:00

ಅಮ್ಮನ ಜೊತೆ ರಂಗೋಲಿ ಹಾಕೋದು ಕಲಿತಿದ್ದು :

ಹೀಗಾ... ಅಮ್ಮ?

ನಂಗೂ ರಂಗೋಲಿ ಪುಡಿ ಕೊಡು.....

ನಾನು ಚಾಕ್‍ಪೀಸ್‍ನಲ್ಲೇ ಬರೀತೀನಿ...

ತುಂಬಾ ಚೆನ್ನಾಗಿದೆ ಅಮ್ಮಾ....ಅಲ್ವಾ ಅಜ್ಜಿ?

ನಮ್ಮ ಮನೆಯಲೊಬ್ಬ ಎಂಟರ್‍ಟೈನರ್ ಇರುವನು......

2009-11-30T21:47:00.003-05:00

ಕಳೆದ ಆಗಸ್ಟ್, ಸೆಪ್ಟೆಂಬರ್‍ನಲ್ಲಿ ಅಮ್ಮನ ಜೊತೆಗೆ ಇಂಡಿಯಾಗೆ ಹೋಗಿದ್ದ ನಿಶು, ಅಲ್ಲಿ ಮಾಡಿದ ಮೋಜು-ಮಸ್ತಿಗಳ ಚಿತ್ರ ಸರಣಿ ಈಗ ಶುರು.
ಅಜ್ಜಿ-ತಾತನ ಮನೆಯಲ್ಲಿ ಒಂದಿನ ಏನಾಯ್ತು ಗೊತ್ತ?

ಭೂತದ ಮರಿ ಥರಾ ಕಾಣ್ತಿದೀನಾ?

ನಂಗೇನೂ ಕಾಣ್ತಿಲ್ವಲ್ಲಾ....

ಚಡ್ಡಿ ಹೀಗೂ ಹಾಕ್ಕೋಬಹುದಲ್ಲಾ?

ಹ್ಹಿ..ಹ್ಹಿ...ಹಿ...ಹ್ಹಿ...ಹ್ಹಿ.......

ಗಾಂಧಿ ತಾತನ ಹುಟ್ಟು ಹಬ್ಬ

2009-10-02T04:13:00.009-04:00

ಈ ದಿನ ಗಾಂಧಿ ತಾತ ಹುಟ್ಟಿದ ದಿನ ಅಂತೆ!

ಕೆಟ್ಟದ್ದನ್ನ ನೋಡದೆ, ಕೇಳದೆ, ಆಡದೆ ಇರೋದೇ ಒಳ್ಳೇದು ಅಂತ ಅವ್ರು ಹೇಳಿದ್ದಂತೆ....

ಮಕ್ಕಳಂದ್ರೆ ಈ ತಾತಂಗೆ ತುಂಬಾ ಇಷ್ಟ ಅಂತೆ...

ಪುಟ್ಟ ಮಗುವಾಗಿದ್ದಾಗ ಅವ್ರು ಅಮ್ಮನ ಜೊತೆ ಹೀಗಿದ್ರಂತೆ!...

ಆಮೇಲೆ ಹೀಗೂ ಇದ್ರಂತೆ!......

ಹ್ಯಾಪಿ ಬರ್ತ್ ಡೇ ಗಾಂಧಿ ತಾತ............

ಗಾಂಧಿ ತಾತ ಹೇಳಿದ್ದು ಮರೀಬೇಡಿ....ಯಾಕಂದ್ರೆ, ಯಾವಾಗ್ಲೂ ಒಳ್ಳೇದಕ್ಕೇ ಒಳ್ಳೇದಾಗೋದಂತೆ.

Happy Birthday Nishoooo......

2009-05-26T23:49:00.006-04:00

ನಿಶೂಗೆ ಇವತ್ತಿಗೆ ನಾಲ್ಕು ವರ್ಷ! ನಿಶು ಎಷ್ಟು ದೊಡ್ಡವನಾದ್ರೂ ಅವನ ಇವತ್ತಿನ ಮಗುತನ, ಕುತೂಹಲ, ಪ್ರೀತಿ, ಉತ್ಸಾಹ ಎಲ್ಲ ಯಾವತ್ತಿಗೂ ಅವನ ಜೊತೆಗೇ ಇರಲಿ ಅಂತ ಅಪ್ಪ, ಅಮ್ಮನ ಹಾರೈಕೆ, ನಿಮ್ಮ ಹಾರೈಕೆಗಳ ಜೊತೆಗೆ.

ಹುಟ್ಟಿದ ಹಬ್ಬದ ದಿನ ನಿನ್ನ ಬ್ಲಾಗ್‍ನಲ್ಲಿ ಏನು ಹಾಕೋದು ಅಂತ ಅಮ್ಮ ಕೇಳಿದಾಗ, ತನ್ನದೊಂದು ಫೇವರೆಟ್ ಹಾಡು ಹಾಡಿ ಅದರ ವೀಡಿಯೋ ಹಾಕಲು ನಿಶೂನೇ ಹೇಳಿದ್ದು. ನಿಶು ಪ್ರೀತಿಯ ಜಯಂತ್ ಅಂಕಲ್ ಮತ್ತು ರಘು ಬರೆದು, ರಘು ಅಂಕಲ್ ಹಾಡಿರೋ ಈ ಹಾಡು ಈಗ ಇಲ್ಲಿದೆ. (ಅಂದ ಹಾಗೆ ನಾವೆಲ್ಲ ಗಿಟಾರ್‍ಪತಿ ಅಂತಲೇ ಕರೀತಿದ್ದ ನಮ್ಮ ಮೈಸೂರಿನ ಹುಡುಗ, ನನ್ನ ಫ್ರೆಂಡ್ ರಘುಪತಿ ದೀಕ್ಷಿತ್ ಈಗ ಬೆಳೆದಿರೋ ಎತ್ತರ ನೋಡಿದರೆ, ಖುಷಿಯಿಂದ ಮನಸ್ಸು ತುಂಬಿ ಬರುತ್ತದೆ. ಸಧ್ಯದಲ್ಲೇ ರಘು ಮೇಲೆ ಒಂದು ಪೋಸ್ಟ್ ನಿಶೂಮನೆಯಲ್ಲಿ ಹಾಕುವ ಆಸೆ ಇದೆ.)

ಈ ಹಾಡಿನ ಸಾಹಿತ್ಯ :

ಪ್ರೀತಿಯ, ಮನಶಾಂತಿಯ, ಸಿರಿಹೊನ್ನಿನ ನಾಡಿದು

ಹಸಿರು ವನಗಳ, ತಂಪು ನದಿಗಳ ಸುಂದರ ಬೀಡಿದು

ಲೋಕವೇ ಒಂದಾಗುವಾ ಸಂಗಮ, ಭೇದವೇ ಇಲ್ಲದ ಹಿರಿತನ

ನಾಳಿನಾ ಹೊಸ ಆಶಾಕಿರಣ

ನಮ್ಮ ನಾಡು, ಕರುನಾಡು.

ಕಡಲಿನ, ಮಲೆ ಮಡಿಲಿನ, ಬಿಸಿ ಬಯಲಿನಾ ನಾಡಿದು

ಬೆವರ ಹನಿಗಳು, ವಿವಿಧ ದನಿಗಳು ಎಳೆಯುವಾ ತೇರಿದು

ಙ್ಞಾನದ ಪರಿತಾನದ ಹಂಬಲ, ಚಿಗುರಿಗೆ ಬೇರಿನ ಬೆಂಬಲ

ಮಮತೆಯ,ಸಮತೆಯ ಅಂಗಳ

ನಮ್ಮ ನಾಡು, ಕರುನಾಡು.

***

ಅಂದ ಹಾಗೆ, ‘ಸರ್ವಮಂಗಳ’ ಚಿತ್ರದಲ್ಲಿರುವ ಈ ಹುಟ್ಟುಹಬ್ಬದ ಹಾಡು ನೋಡಿದೀರಾ? ಇಲ್ಲ ಅಂದ್ರೆ ಈಗ್ಲೇ ನೋಡಿಬಿಡಿ. ಈ ದಿನ ಹುಟ್ಟಿದ ಹಬ್ಬ ಆಚರಿಸಿಕೊಳ್ತಿರುವ ಎಲ್ಲ ಮಕ್ಕಳಿಗೂ ಈ ಹಾಡು.

Little piggy

2009-04-21T05:59:00.015-04:00

ಇನ್ನೂ ವರ್ಷವೂ ತುಂಬಿರದಿದ್ದ ನಿಶೂನ ಈ ಪುಟ್ಟ ಪಾದಗಳ ಒಂದೊಂದೇ ಬೆರಳು ಹಿಡಿದು, ‘ದಿಸ್ ಲಿಟಲ್ ಪಿಗ್ಗಿ...’ ಎಂದು ನಾನು ಹಾಡುತ್ತಿದ್ದಾಗ, ದೂರಿಯಾಡುತ್ತಾ ತನ್ನ ಕಾಲ್ಬೆರಳುಗಳನ್ನ ತಾನೂ ಹಿಡಿಯುವ ಆಟ ಆಡುತ್ತಿದ್ದ ಈ ಮಗುವಿಗೆ ಮುಂದಿನ ತಿಂಗಳಿಗೆ ನಾಲ್ಕು ವರ್ಷ ತುಂಬಲಿದೆ. ಈಗಲೂ ನಿಶೂಗೆ ಈ ಹಾಡು ಇಷ್ಟ. ಅಮ್ಮನೋ, ಅಪ್ಪನೋ ತನ್ನ ಕೈ, ಕಾಲು ಬೆರಳಿನ ಉಗುರು ಕತ್ತರಿಸುವಾಗ ತಾನೇ ಹಾಡುತ್ತಾನೆ. ಅಮ್ಮನ ದೆಸೆಯಿಂದ ಈ ಲಿಟಲ್ ಪಿಗ್ಗಿ ಈಗ ಹಂದಿಮರಿ ಆಗಿರೋದಲ್ಲದೆ, ಇಂಗ್ಲಿಷ್ ರೈಮ್‍ನಲ್ಲಿ ಅತ್ತ ಹಾಗೆ ವೀ ವೀ ಅಂತ ಅಳದೆ, ಕನ್ನಡದಲ್ಲಿ ಆನಂದವಾಗಿ ಅಹ್ಹಹ್ಹಹ್ಹಾ...ಅಂತ ಅಟ್ಟಹಾಸ ಮಾಡ್ತಿದೆ. ನೀವೇ ನೋಡಿ ಬೇಕಿದ್ರೆ....

This little piggy went to market,

This little piggy stayed at home,

This little piggy had some pizza,

This little piggy had none.

And this little piggy went 'Wee wee wee' all the way home...

ಈ ಹಂದಿಮರಿ ಹೋಯ್ತು ಮಾರುಕಟ್ಟೆಗೆ

ಈ ಹಂದಿಮರಿ ಉಳೀತು ಮನೆಯೊಳಗೆ

ಈ ಹಂದಿಮರಿ ತಿಂತು ಕಡ್ಲೆ-ಬೆಲ್ಲ

ಈ ಹಂದಿಮರೀಗ್ ಪಾಪ ಏನೂ ಇಲ್ಲ

ಈ ಹಂದಿಮರಿ ಯಾಕೊ ಸುಮ್‍ಸುಮ್ನೆ ನಗ್ತಾ ಇತ್ತು

ಅಹ್ಹಹ್ಹಹ್ಹ ಹಹ್ಹಹ್ಹಹ್ಹ ಹಾ!

***

ವೀಡಿಯೋನೂ ನೋಡ್ತೀರ?

ಹ್ಯಾಪಿ ವ್ಯಾಲಂಟೈನ್ಸ್ ಡೇ....

2009-02-14T17:02:00.008-05:00

ನಿಶು ಸ್ಕೂಲಿನಲ್ಲಿ ಒಂದು ವಾರದಿಂದ ವ್ಯಾಲಂಟೈನ್ಸ್ ಡೇ ದಿನದ ಸಂಭ್ರಮ. ವಾರದ ಕೊನೆಯಲ್ಲಿ ಬರುವ ಈ ಪ್ರೀತಿಯ ದಿನಕ್ಕಾಗಿ ಮಕ್ಕಳು ದಿನಕ್ಕೊಂದು ಬಣ್ಣ ಬಣ್ಣದ ಚಿತ್ರ, ಕ್ರಾಪ್ಗ್ಟ್ಸ್ ಎಲ್ಲ ಮಾಡಿದ್ದರು. ನಿಶು ಮಾಡಿದ್ದ ಕ್ರಾಫ್ಟ್ಗಳಲ್ಲಿ ಕೆಲವು ಇಲ್ಲಿದೆ.

ನಾನು ಸ್ಕೂಲಿಗೆ ಹೋದಾಗ, ನೀನು ನನ್ನ ಮಿಸ್ ಮಾಡ್ತೀಯಲ್ಲ ಅಮ್ಮ...ಅದಕ್ಕೆ ನಿಂಗೆ ಇದು ...

ಇದು ಹಗ್ಸ್ ಅಂಡ್ ಕಿಸ್ಸೆಸ್ ಅಮ್ಮಾ.....

ಇದು ನನ್ನ ವ್ಯಾಲಂಟೈನ್ಸ್ ಡೇ ಬೆಕ್ಕಿನ ಮರಿ...

....ಮತ್ತೆ ಇದು....ನಿಂಗೆ, ಅಪ್ಪಂಗೆ, ಎಲ್ರಿಗೂ...ಐ ಲವ್ ಯೂ.......

*********

ಅಮೆರಿಕದಲ್ಲಿ ವ್ಯಾಲಂಟೈನ್ಸ್ ಡೇ ಕೇವಲ ‘ಪ್ರೇಮಿಗಳ ದಿನ’ ಅಲ್ಲ, ‘ಪ್ರೀತಿಯ ದಿನ’. ಪುಟ್ಟ ಮಕ್ಕಳು, ದೊಡ್ಡವರು ಎಲ್ಲರೂ ತಮ್ಮ ಪ್ರೀತಿಪಾತ್ರರಿಗೆ ‘ಐ ಲವ್ ಯು’ ಹೇಳುತ್ತಾ ಆಚರಿಸುವ ದಿನ. ಮಕ್ಕಳಿಗೆ ನಾವು ಕೊಡಬಹುದಾದ, ಅವರ ಬದುಕಿನುದ್ದಕ್ಕೂ ಉಳಿಯುವ, ಕಾಪಾಡುವ ಕೆಲವೇ ಉಡುಗೊರೆಗಳಲ್ಲಿ ಪ್ರೀತಿಯೂ ಒಂದು ಎನ್ನುವುದು ನನ್ನ ನಂಬಿಕೆ. ಈ ಬಗ್ಗೆ ಇವತ್ತಿನ ಕೆಂಡಸಂಪಿಗೆಯಲ್ಲಿ ನಾನು ಬರೆದ ಬರಹ ಇಲ್ಲಿದೆ. ನಿಮ್ಮೆಲ್ಲರಿಗೂ ‘ಹ್ಯಾಪಿ ವ್ಯಾಲಂಟೈನ್ಸ್ ಡೇ’.

೧೦ ತಿಂಗಳ ನಿಶು ತನ್ನ ಗೊಂಬೆಗಳ ಮೇಲೆ, ಅಪ್ಪ-ಅಮ್ಮನ ಮೇಲೆ ಪ್ರೀತಿಯ ಧಾರೆ ಹರಿಸುತ್ತಾ, ಸಂಭ್ರಮಿಸುತ್ತಾ ಇದ್ದ ದಿನಗಳಲ್ಲಿ ತೆಗೆದ ಒಂದು ವೀಡಿಯೋ ತುಣುಕು ಇಲ್ಲಿದೆ....ನಿಮಗಾಗಿ.

Pumpkin patch visit - Oct 08

2009-01-10T12:30:00.000-05:00

ಕಳೆದ ಅಕ್ಟೊಬರ್‍ನಲ್ಲಿ ಒಂದು ದಿನ ಸ್ಕೂಲ್‍ಬಸ್ ಹತ್ತಿ, ನಿಶು ಮತ್ತವನ ಒಂದಷ್ಟು ಸ್ನೇಹಿತರು ಕುಂಬಳಕಾಯಿ ತರಲಿಕ್ಕೆ ಅಂತ ಇಲ್ಲೊಂದು ಫಾರ್ಮ್‍ಗೆ ಹೋಗಿದ್ರು. ಅಲ್ಲಿ ಕುಂಬಳಕಾಯಿಯ ಜೊತೆಗೇ ಬೇರೆ ಬೇರೆ ತರಕಾರಿಗಳೂ ಇದ್ವು. ಹತ್ತಿರ ಹೋಗಿ ಮುಟ್ಟಬಹುದಾದ ಪುಟಾಣಿ ಮರಿಗಳಿರುವ pet zoo ಇತ್ತು. ಟ್ರಾಕ್ಟರ್ ಹತ್ತಿ, ಹುಲ್ಲಿನ ಪಿಂಡಿಗಳ ಮೇಲೆ ಕುಳಿತು ಫಾರ್ಮ್ ಪೂರಾ ಸುತ್ತಿ ಸುಸ್ತಾಗಿ, ಮನೆಯಿಂದ ತಂದ ಬುತ್ತಿ ತಿಂದು ಇವರೆಲ್ಲ ಮತ್ತೆ ಬಸ್ ಹತ್ತಿ ಕುಳಿತು, ತಮ್ಮ ತಮ್ಮ ಅಮ್ಮನನ್ನೋ ಅಪ್ಪನನ್ನೋ ಒರಗಿಕೊಂಡು ತೂಕಡಿಸುತ್ತಾ ಮನೆಗೆ ಬಂದು ಸೇರಿದ್ದಾಯ್ತು. ಆಮೇಲೆ ನಿಶು ಮನೇಲಿ ಮೂರ್ನಾಲ್ಕು ದಿನ ಕುಂಬಳಕಾಯಿ ಪಲ್ಯ, ಕುಂಬಳಕಾಯಿ ಮಜ್ಜಿಗೆಹುಳಿ, ಕುಂಬಳಕಾಯಿ ಪೈ....ಅಯ್ಯೋ ಹೋಗ್ಲಿ ಸಾಕು ಬಿಡಿ....ಈಗ ಫೋಟೋ ನೋಡ್ಬಿಡಿ.

ಕೋಳಿಮರಿ, ಕೋಳಿಮರಿ...ಕಾಳು ಬೇಕೇ?

ಕಾಳು ಬೇಕು, ಕೂಳು ಬೇಕು...ಎಲ್ಲ ಬೇಕು

ಕುರೀಮರೀಗೂನು ಈಗ ಹಸಿವು ಆಗಿದೆ

ಮೇಕೆಮರಿಯೂ ಬಾಯಿ ಹಾಕಿ ಹುಲ್ಲು ತಿಂತಿದೆ

************

ಹಲೋ...ನನ್ಹೆಸ್ರು ಕುಂಬಳ ಅಂತ. ಬನ್ನಿ ಬನ್ನಿ .............

ಟ್ರಾಕ್ಟರ್ ಸವಾರೀಗೆ ರೆಡೀನಾ?

ಟ್ರಾಕ್ಟರ್ ಸವಾರಿ ಏನ್ ಗಮ್ಮತ್ತಪ್ಪಾ....ಮಜಾ ಅಂದ್ರೆ ಮಜಾ.........

ಅಮ್ಮಾ ಅಮ್ಮಾ....ಅದೇನು?

ಇದಕ್ಕೆ ಕಾಲಿಫ್ಲವರ್ ಅಂತ ಯಾಕಂತಾರೆ?

ಪಂಪ್‍ಕಿನ್ ಪ್ಯಾಚ್ ಬಂತು!................

ಹೀಗೆ ಬಗ್ಗಿ, ಎರಡೂ ಕೈಯಲ್ಲಿ ಹಿಡಿದು....

ಕುಂಬಳಕಾಯಿ ಎತ್ಕೋಬೇಕು.

ಆಮೇಲೆ, ಹೀಗೆ ನಿಧಾನಕ್ಕೆ ಎತ್ಕೊಂಡು ಹೋಗಿ....

ಅಮ್ಮಂಗೆ ಕೊಡ್ಬೇಕು.

ಬಾಯ್ ಬಾಯ್ ಪಂಪ್ಕಿನ್ ಪ್ಯಾಚ್.....

ಅಮ್ಮಾ, ಕುಂಬಳಕಾಯಿ ಇಲ್ಲೇ ಇಟ್ಟು ಮಾರೋಣ್ವಾ?

ನೋಡು ಎಷ್ಟು ಜನ ಗಿರಾಕಿಗಳಿದಾರೆ ಇಲ್ಲಿ!

Happy New Year

2008-12-31T01:01:00.005-05:00

ಮುನಿಸಿಕೊಂಡು ಕುಳಿತಿರೋ ನನ್ನ ಕಂಪ್ಯೂಟರ್ ಸಿಟ್ಟು ಇನ್ನೂ ಇಳಿದಿಲ್ಲ. ಕಂಪ್ಯೂಟರ್ ಇಲ್ಲದೆ ಒಂದು ಕೈ ಕಳೆದುಕೊಂಡ ಹಾಗೂ, ಕನ್ನಡ ಲೋಕಕ್ಕೆ ನಾನು ತೆರಿದಿಟ್ಟಿರುವ ಕಿಟಕಿ, ಬಾಗಿಲುಗಳೆಲ್ಲ ಮುಚ್ಚಿಕೊಂಡಿರೋ ಹಾಗೂ ಅನ್ನಿಸುತ್ತಿರುವಾಗ ತನ್ನ ಪಾಡಿಗೆ ತಾನು ಹೊಸ ವರ್ಷ ಬಂದಿದೆ. ನನ್ನದಲ್ಲದ ಕಂಪ್ಯೂಟರ್‌ನಿಂದ ಈ ಪೋಸ್ಟ್ ಮಾಡ್ತಾ ಇದೀನಿ.

ನಿಮ್ಮೆಲ್ರಿಗೂ ಹೊಸ ವರ್ಷದ ಶುಭಾಶಯಗಳು. ನನ್ನ ನಿಶೂ ಹಾಗೇ ನೀವೂ ಎಲ್ಲ ಸದಾ ಕಾಲ ನಗ್ತಾ, ನಲೀತಾ ಸಂತೋಷವಾಗಿರಿ.

HAPPY NEW YEAR

ಒಂದು ವಚನ ಕೇಳ್ತೀರಾ...?

2008-10-26T22:35:00.013-04:00

ನಿಶು ಅಮ್ಮನಿಗೆ ನಿಂತಲ್ಲಿ ಕೂತಲ್ಲಿ ಹಾಡು ಗುನುಗುತ್ತಾ ಇರೋ ಅಭ್ಯಾಸ. ಹಾಗೆ ಅಮ್ಮ ಗುನುಗೋ ಭಾವಗೀತೆ, ಚಿತ್ರಗೀತೆ, ವಚನ, ದೇವರನಾಮ ಎಲ್ಲವನ್ನೂ ಸಲೀಸಾಗಿ ಕದ್ದು ಇದ್ದಕ್ಕಿದ್ದಂತೆ ಒಂದು ದಿನ ಪೂರಾ ಹಾಡು ಹೇಳಿ ಅಮ್ಮ, ಅಪ್ಪ ಇಬ್ಬರಿಗೂ ಸರ್ಪ್ರೈಸ್ ಕೊಡೋದು ನಿಶು ಹವ್ಯಾಸ. ಹಾಡಿನ ಜೊತೆಗೆ, ಎಲ್ಲ ಹಾಡನ್ನೂ ಡ್ಯಾನ್ಸ್ ಮಾಡುತ್ತಾ ಹೇಳೋದು ಅದು ಹ್ಯಾಗೋ ನಿಶೂಗೆ ತುಂಬಾ ತುಂಬಾ ಇಷ್ಟ. ಹೀಗಾಗಿ ಕಲಿತ ಹಾಡಿಗೆಲ್ಲ ಅರ್ಥ ಕೇಳಿ ತಾನೇ ಕೋರಿಯೋಗ್ರಫಿ ಮಾಡಿಕೊಳ್ಳೋದುಂಟು. ಇವನ ಈ ಹಾಡು, ಅಭಿನಯ, ಅರ್ಥವಂತಿಕೆಯೆಲ್ಲಾ ನಿಮ್ಮ ಜೊತೆ ಹಂಚಿಕೊಳ್ಳೋ ಖುಷಿ ನನ್ನದು!

ಬಸವಣ್ಣನವರ ಈ ವಚನ ನನಗೂ ನಿಶೂಗೂ ತುಂಬಾ ಇಷ್ಟ. ಅಭಿನಯಿಸುತ್ತಾ ಹೇಳುವಾಗ, ಅರ್ಥ ವಿವರಿಸುವಾಗ ಅದು ಹ್ಯಾಗೋ ಮಧ್ಯ ನುಸುಳುತ್ತಿದ್ದ ಸಿಲ್ಲಿ ಗಿಗಲ್‍ಗಳಿಗೆಲ್ಲ ಕತ್ತರಿ ಹಾಕಿದ್ದಾಗಿದೆ. `ಕಲಬೇಡ ಕೊಲಬೇಡ' ಅಂತ ಹಾಡುತ್ತಾ ಮಧ್ಯೆ ಮಧ್ಯೆ ನಿಶು ಮೂಗಿಗೆ ಬೆರಳಿಡಲು ಶುರು ಮಾಡುತ್ತಿದ್ದಂತೆ `ಮೂಗೊಳಗೆ ಬೆರಳಿಡಬೇಡ' ಅಂತ ಅಮ್ಮ ಹಾಡಿದ್ದೂ ಎಡಿಟ್ ಆಗಿದೆ. ಈಗ ನೀವೂ ಈ ವಚನ ಕೇಳಿ, ನೋಡಿ......

ದೀಪಾವಳಿ ಶುಭಾಶಯಗಳು ನಿಮ್ಮೆಲ್ರಿಗೂ....

ನಿಶು ಮನೆಗೆ ಬಂದವರ್ಯಾರು?

2008-10-06T22:41:00.011-04:00

ನನ್ನ ಪ್ರೀತಿಯ ಕವಿ, ಕಥೆಗಾರ ಜಯಂತ್ ಕಾಯ್ಕಿಣಿ ಈ ಬಾರಿ ವಿಶ್ವ ಕನ್ನಡ ಸಮ್ಮೇಳನಕ್ಕೆ ಅಂತ ಶಿಕಾಗೋಗೆ ಬಂದು, ಹಾಗೇ ಇಲ್ಲಿ ನ್ಯೂಜೆರ್ಸಿಗೂ ಬಂದವರು ನಿಶುಮನೆಗೂ ಬಂದೇ ಬಿಟ್ಟರು! ನಿಶೂಗೆ ಜಯಂತ್ ಅಂಕಲ್‍ನ ಪರಿಚಯ ಮಾಡಿಕೊಡ್ತಾ, `ನೋಡು ಚಿನ್ನಾ, ಈ ಅಂಕಲ್ಲೇ ನಿನ್ನ ಗಾಳಿಪಟ ಹಾಡು ಬರ್ದಿರೋದು' ಅಂದ್ರೆ, ತನ್ನ ಯಾವತ್ತಿನ style ನಲ್ಲೇ ನಿಶು ಕೇಳಿದ್ದು `why' ಅಂತ!

ಇವನ ಪ್ರಶ್ನೆಗೆ ನಾನು ಉತ್ತರಿಸೋ ಮೊದಲೇ ಅಂಕಲ್ ಇವನನ್ನ ಎತ್ತಿ, ಮುದ್ದಾಡಿ, ಚೆಂಡಾಡಿ, ಕೊಂಡಾಡಲು ಶುರುವಿಟ್ಟಾಗಿತ್ತು.
ಇವರಿಬ್ಬರ ಈ ಅಮೃತ ಘಳಿಗೆಯನ್ನ ಕಣ್ಣ ತುಂಬಾ ನೋಡೋದೋ, ಕ್ಯಾಮರಾದಲ್ಲಿ ಸೆರೆ ಹಿಡಿದುಬಿಡೋದೋ ಗೊತ್ತಾಗದೆ, ಅಂತೂ ಕ್ಯಾಮೆರಾ ಕೈಗೆತ್ತಿಕೊಂಡರೆ, ಮೆಮೋರಿ ಫುಲ್ಲಾಗಿ ........`live view' ಇಲ್ಲದೆ....... ಅಂತೂ ಕಷ್ಟ ಪಟ್ಟು ತೆಗೆದ ಒಂದಷ್ಟು ಚಿತ್ರಗಳಲ್ಲಿ, ಕೆಲವು ಇಲ್ಲಿವೆ. ಹಿಂದೆ ಬ್ಯಾಕ್‍‍ಲೈಟ್ ಬೇರೆ ಇದ್ದು, ಏನೂ ಕಾಣೀಸದೇ ಇದ್ದ ಚಿತ್ರಗಳಲ್ಲೂ ಅಷ್ಟಿಷ್ಟು ಕೈಯ್ಯಾಡಿಸಿ ಹಾಕಿದ್ದೇನೆ.
ನಿಶೂನ ಅತ್ತೆ ತೆಗೆದ ಒಂದು ಚಿತ್ರ, ಜೊತೆಗೆ ಜಯಂತ್ camera ದಲ್ಲಿ ಪ್ರಸನ್ನ ಅವರು ತೆಗೆದ ಒಂದು ಚಿತ್ರ ಕೂಡ ಇಲ್ಲಿದೆ.

........ಹತ್ರ ಹೋಗಿ, ಗುಟ್ಟು ಹೇಳಿ...........

.........ಸಿಕ್ಕೇಬಿಟ್ಟ ಅನ್ನುವಾಗ..ನಾನೇನ್ಮಾಡ್ತೀನ್ ಗೊತ್ತಾ?.......

.......ಹಾಗೇ ಹಿಂದಕ್ಕೆ ಬಗ್ಗಿ.................

........ಪಲ್ಟಿ ಹಾಕಿಬಿಡ್ತೀನಿ........

..... ನಾನೇ ಗೆದ್ದಿದ್ದೂ!!!

ಜಯಂತ್ ಅಂಕಲ್ ಅಮ್ಮಂಗೂ ಫ್ರೆಂಡ್‍ ಅಂತೆ...

ಅತ್ತೆ, ಮಾವಾನೂ ಅವರ ಜೊತೆ ಫೋಟೋ ತೆಗೆಸಿಕೊಂಡ್ರು....

ಆದ್ರೆ ಅವ್ರು ನನ್ ಜೊತೇನೇ ಜಾಸ್ತಿ ಫೋಟೋ ತೆಗೆಸಿಕೊಂಡಿದ್ದು
ಎಲ್ಲಾರ್ಗಿಂತ ಅವ್ರು ನಂಗೇ ಜಾಸ್ತಿ ಫ್ರೆಂಡು

ಜಯಂತ್ ಅಂಕಲ್‍ನೇ ಕೇಳಿ ನೋಡಿ ಬೇಕಿದ್ರೆ!

*******

Special thanks to :

ನಿಶು ಬ್ಲಾಗಲ್ಲಿ ಈ ಚಿತ್ರಗಳನ್ನ ಹಾಕಬಹುದಾ ಅಂತ ಕೇಳಿದ್ದಕ್ಕೆ, ಒಂಚೂರೂ ತಡಮಾಡದೆ `ಓಕೆ' ಹೇಳಿದ ಜಯಂತ್ ಮತ್ತು ಸ್ಮಿತಾಗೆ.

ನಿಶೂ ಬರೆದ ಗಣೇಶನ ಚಿತ್ರ

2008-09-29T15:13:00.003-04:00

ಮೊನ್ನೆ ಗಣಪತಿ ಹಬ್ಬದಲ್ಲಿ ಅಮ್ಮ (ಯಾವತ್ತೋ) ಮಾಡಿದ್ದ ಗಣಪತಿ ಪೆಯಿಂಟಿಂಗ್ ನೋಡಿದಾಗಿನಿಂದ ನಿಶೂಗೆ ಗಣಪತಿ ಚಿತ್ರ ಬರೆಯೋ ಹುಕ್ಕಿ ಬಂದುಬಿಟ್ಟಿದೆ. ತನ್ನ ಮ್ಯಾಗ್ನೆಟಿಕ್ ಸ್ಲೇಟಿನಲ್ಲಿ ನಿಶೂ ಬರೆದ ಗಣಪನ ಚಿತ್ರ ಇಲ್ಲಿದೆ.

ಗಣಪತಿ ಬರೆಯೋದು ತುಂಬಾ ಸುಲಭ ಅಮ್ಮಾ.....

ನೋಡು ನಾನೂ ಬರೆದ್ಬಿಟ್ಟೆ!....

ಹೀಗೇ ತಾನೆ?

ಆದ್ರೆ ಈ ಇಲಿ ಬರೆಯೋದು ಹ್ಯಾಗೆ ಗೊತ್ತಾಗ್ಲಿಲ್ಲ.......

ಆನೆ ಬಂತೊಂದಾನೆ

2008-08-12T11:38:00.018-04:00

ಇದು ನಿಶುಮರಿ ತಿನ್ನೋ ಆನೆಮರಿ. ಪ್ಯಾನ್‍ಕೇಕ್ ದೇಹ, ಕ್ಯಾರೆಟ್ ಕಾಲು-ಬಾಲ, ಸಕ್ರೆ ಕಣ್ಣು....ಈ ಆನೆಮರೀಗೆ.
******

ನಿಶು ಒಂದು ವರ್ಷದ ಮಗುವಿದ್ದಾಗ, ಅವನನ್ನು ಸಾಲಿತ್‍ವಿಕ್ ಜ಼ೂಗೆ ಕರ್ಕೊಂಡು ಹೋಗಿದ್ವಿ. ಪ್ರಾಣಿ, ಪಕ್ಷಿಗಳನ್ನ ತುಂಬಾ ತುಂಬಾ ಇಷ್ಟ ಪಡುವ ನಿಶೂ ಅಲ್ಲಿ ಆನೆ ನೋಡಿದ್ದು ಹೀಗೆ........

......ಅಲ್ಲಿಂದ ಮನೆಗೆ ಬಂದ ಮೇಲೆ, `ಆನೆ ಮರಿ ಹ್ಯಾಗಿರತ್ತೆ' ಅಂತ ಕೇಳ್ದಾಗೆಲ್ಲ `ಹೀಗೆ ' ಅಂತ ತೋರಿಸ್ತಿದ್ದ.....

..................ಹೀಗೂ..................

...ಮತ್ತು.....ಹೀಗೂ ಇರತ್ತಂತೆ.

...............ಅಷ್ಟೇ ಅಲ್ಲ, ತನ್ನ ಗೊಂಬೆಗಳನ್ನೆಲ್ಲ ಸಾಲಾಗಿ ಕೌಚ್ ಮೇಲೆ ಕೂರಿಸಿ, ಅವಕ್ಕೆಲ್ಲ ಆನೆಸವಾರಿ ಮಾಡಿಸ್ತಿದ್ದ!

ಆಶ್ಲ್ಯಾಂಡ್ ಲಕ್ಷ್ಮೀ ದೇವಸ್ಥಾನದಲ್ಲೂ ಮೊದಲು ಕಣ್ಣಿಗೆ ಬೀಳ್ತಿದ್ದಿದ್ದು, ಕಂಭದ ಮೇಲೆ, ಗೋಡೆ ಮೇಲೆ ಇದ್ದ ಆನೆಗಳೇ.

ಮೊನ್ನೆ ಮೂರು ತುಂಬಿದಾಗ, ನಿಶು ನ್ಯೂ ಜೆರ್ಸಿಯ ಸಿಕ್ಸ್‌ಫ್ಲಾಗ್ಸ್‌ನಲ್ಲಿರೋ ಅನಿಮಲ್ ಸಫಾರಿಯಲ್ಲಿ ಕಂಡ ಆನೆಗಳು..............

....................ಹೀಗಿದ್ವು.

ಇಲ್ಲೇ ಮನೆ ಹತ್ತಿರ ನಡೀತಿದ್ದ ಕಾರ್ನಿವಲ್ ಒಂದರಲ್ಲಿ, ಅಪ್ಪನ ಜೊತೆ `ಹಾರೋ ಆನೆ' ಗಿರಗಿಟ್ಲೆ ಮೇಲೆ ಕೂತು ನಿಶು ಎಂಜಾಯ್ ಮಾಡಿದ್ದು ಹೀಗೆ...

...............ಮತ್ತು ಹೀಗೆ!

ನಂಗೆ ಗೊತ್ತಿರೋ ಒಂದಿಷ್ಟು ಆನೆ ಹಾಡುಗಳು ಇಲ್ಲಿವೆ.

ಆನೆ ಹಾಡು - ೧

ಆನೆ ಬಂತೊಂದಾನೆ

ಏರಿ ಹತ್‍ತೊಂದಾನೆ

ದಾರೀಲ್ ನಡೀತೊಂದಾನೆ

ಎಳೆಹುಲ್ ಮೇಯ್ತೊಂದಾನೆ

ತಿಳಿನೀರ್ ಕುಡೀತೊಂದಾನೆ

ಹಿಂಡಲ್ಲಿ ಉಳೀತೊಂದಾನೆ

ಕಂಡಲ್ಲಿ ನಡೀತೊಂದಾನೆ

ಆನೆಗಳೆಲ್ಲ ಸಾಲಿಡುವಾಗ....

ಇದೆಲ್ಲಿ ಬಂತು ಮರಿಯಾನೆ?

ಇದೆಲ್ಲಿ ಬಂತು ಪುಟ್ಟಾನೆ?

(ಕಡೆಯ ಎರಡು ಸಾಲು ಹೇಳುವಾಗ ನಿಮ್ಮ ಮುಂದೆ ಇರೋ ಪುಟ್ಟಾನೆ ಮರಿಯನ್ನು ಹಿಡಿದು ಕಚಗುಳಿ ಕೊಟ್ಟರೆ, ತುಂಬಾ ಚೆನ್ನಾಗಿರತ್ತೆ).

ಆನೆ ಹಾಡು - ೨

ಆನೆ ಬಂತೊಂದಾನೆ

ಯಾವೂರಾನೆ?

ಬಿಜಾಪುರದಾನೆ

ಇಲ್ಲೀಗ್ಯಾಕೆ ಬಂತು?

ದಾರಿ ತಪ್ಪಿ ಬಂತು

ದಾರೀಲೊಂದು ಕಾಸು,

ಬೀದೀಲೊಂದು ಕಾಸು

ಎಲ್ಲಾ ದುಡ್ಡೂ ತಗೊಂಡು

ಶೆಟ್ರಂಗ್‍ಡೀಗ್ ಹೋಗಿ,

ಕೊಬ್ರಿ ಮಿಟಾಯ್ ಕೊಂಡ್‍ಕೊಂಡು,

ಮಕ್ಕಳ್‍ಗೆಲ್ಲ ಕೊಟ್ಟು,

ತಾನೊಂಚೂರ್ ತಿಂದು,

ಆನೆ ಓಡಿ ಹೊರ್ಟ್‌‍ಹೋಯ್ತು!

(ಈ ಹಾಡು ಹೇಳುವಾಗ, ನೀವೇ ಆನೆ ಆಗಿ ನಿಮ್ಮ ಪುಟಾಣಿಗೆ ಆನೆಸವಾರಿ ಮಾಡಿಸಬೇಕು)

ಬೆಳಗ್ಗೆ ತಿನ್ನೋಕೆ ಕರಡೀನೇ ಬೇಕು!

2008-07-10T08:55:00.001-04:00

ಬೆಳಗ್ಗೆ ಎದ್ದ ಕೂಡ್ಲೆ ನಿಶು ಏನೇನು ತಿಂತಾನೆ? ಸೇಬು, ಕಿತ್ತಳೆ, ಸ್ಟ್ರಾಬೆರ್ರಿ, ಚೆರ್ರಿ, ಬಾಳೆಹಣ್ಣು, ದ್ರಾಕ್ಷಿ.....ಯಾವ ಹಣ್ಣಾದ್ರೂ ಆಗತ್ತೆ. ಜೊತೆಗೆ ಕರಡಿ, ಆನೆ, ಹಂದಿ, ಬಸ್ಸು, ಮೀನು, ಆಕ್ಟೋಪಸ್ಸು, ಕಂಬಳಿ ಹುಳ......ಹೀಗೆ ಇವೆಲ್ಲ ಇರ್ಲೇ ಬೇಕು! ನಿಶು ತಿನ್ನೋ ಕರಡಿ ಇಲ್ಲಿದೆ ನೋಡಿ.

ಪ್ಯಾನ್ ಕೇಕ್, ದ್ರಾಕ್ಷಿ, ಸ್ಟ್ರಾಬೆರ್ರಿ, ರಾಸ್ಬೆರ್ರಿ ಎಲ್ಲ ಸೇರಿ ಆದ ನಮ್ಮ ಕರಡಿ ಮರಿ ಇಲ್ಲಿದೆ. ನಿಮಗಿದು ಕರಡಿ ತರ ಕಾಣತ್ತೋ ಇಲ್ವೋ, ನಿಶು ಅಂತೂ ಇದು ಕರಡೀನೇ ಅಂತ ಒಪ್ಪಿಕೊಂಡಿದಾನೆ. ಹೀಗಾಗಿ ಬೆಳಗಿನ ತಿಂಡಿ ಅಷ್ಟು ಅರಾಮವಾಗಿ ಹೊಟ್ಟೆಗಿಳಿಯದ `ಸ್ಪೆಷಲ್ ದಿನ'ಗಳಲ್ಲಿ, ಅಮ್ಮನ ಮ್ಯಾಜಿಕ್‍ನಿಂದ ಪ್ಲೇಟ್ ಮೇಲೆ ಪ್ರತ್ಯಕ್ಷವಾಗೋ ಈ ಕ್ರಿಯೇಚರ್‍ಗಳು ನಿಶು ಮುಖದಲ್ಲಿ ನಗು ತುಂಬುತ್ತಾ, ಅವನ ಹೊಟ್ಟೆಯೂ ತುಂಬೋ ಹಾಗೆ ಮಾಡತ್ವೆ.

ಕರಡಿ ತಿಂಡಿ ತಿಂದ್ರೆ ಸಾಕ? ಕರಡಿ ಹಾಡು ಬೇಡ್ವ? .....ಇಲ್ಲಿದೆ ನೋಡಿ ಕರಡಿ ಹಾಡು. ವೀಡಿಯೋ ಕ್ವಾಲಿಟಿ ಅಷ್ಟು ಚೆನ್ನಾಗಿಲ್ಲ, ಸ್ವಲ್ಪ ಅಡ್ಜಸ್ಟ್ ಮಾಡ್ಕೊಳ್ಳಿ...ಸರೀನಾ?

ಇಂಗ್ಲಿಷ್‍ನಲ್ಲಿರೋ ಈ ಕರಡಿ ಹಾಡು ಕನ್ನಡದಲ್ಲಿ ಹೀಗಾಗಬಹುದೇನೋ ಅನ್ನಿಸ್ತು. ನಿಮಗೆ ಏನನ್ನಿಸ್ತು? ಕನ್ನಡದಲ್ಲಿ ಈ ಮುಂಚೇನೂ, ಸುಮಾರು ಹೀಗೇ ಇದ್ದ ಕರಡಿ ಹಾಡೊಂದು ಎಲ್ಲೋ ಕೇಳಿದ್ದ ನೆನಪು. ನಿಮ್ಮಲ್ಲಿ ಯಾರಿಗಾದ್ರೂ ಆ ಹಾಡು ಗೊತ್ತಿದ್ರೆ ತಿಳಿಸಿ.

ಹ್ಯಾಪಿ ಬರ್ತ್‍ ಡೇ ನಿಶೂ.....

2008-05-26T09:18:00.001-04:00

HAPPY 3RD BIRTHDAY

NISHANTH

ಇನ್ನೊಂದು ಗಾಳಿಪಟ!!!

2008-05-20T05:47:00.003-04:00

ಕೆಲವು ದಿನಗಳ ಹಿಂದೆ, youtube-ನಲ್ಲಿ kite festival-ವೀಡಿಯೋಗಳನ್ನ ನೋಡ್ತಿದ್ದ ಅಮ್ಮಂಗೂ ನಿಶೂಗೂ, ಅಚಾನಕ್ ಆಗಿ `ಗಾಳಿಪಟ' ಕನ್ನಡ ಸಿನಿಮಾ ಹಾಡು ಸಿಕ್ತು. ಕಾಯ್ಕಿಣಿಯವರ ಹಾಡು, ಹರಿಕೃಷ್ಣ ಮ್ಯೂಸಿಕ್ಕು, ಗಣೇಶ ಮತ್ತು ಪಾರ್ಟಿ ಮಾಡಿರೋ ಡ್ಯಾನ್ಸು.....ಎಲ್ಲಕ್ಕೂ ಪೂರ್ತಿ ಇಂಪ್ರೆಸ್ಸ್ ಆಗಿಬಿಟ್ಟ ನಿಶು, ಇನ್ನೂ ಈ ಹಾಡಿನ ಗುಂಗಿನಿಂದ ಹೊರಬಂದಿಲ್ಲ. ತಾನೇ ಕೋರಿಯಾಗ್ರಫಿ ಮಾಡಿಕೊಂಡು ಹಾಡಿ, ಕುಣಿದಿರೋ ಈ ಹಾಡು ನೀವೂ ಒಂದ್ಸಲ ನೋಡ್ಬಿಡಿ.

ಸೃಷ್ಟಿಗೆ

2008-04-15T19:33:00.008-04:00

ಬದುಕಿನ ಬಯಕೆಯ ಸೃಷ್ಟಿಗೆ

ನೀಲಿ ಆಕಾಶದಲ್ಲೊಂದು
ಗಾಳಿಪಟ

ಏರುವ ಎತ್ತರ

ಬೀಸುವ ಗಾಳಿಯ ಅಧೀನ,

ಕೆಳಗೆ ಯಾರದೋ ಕೈ

ದಾರ ತೂರುವ,

ಕೆಳಗಿಳಿಸುವ

ಹುನ್ನಾರ.

ಗಿರಕಿ ಹೊಡೆದು, ನುಲಿದು

ಬಾಲಂಗೋಚಿಯ ಜೊತೆಗೆ

ಕುಣಿದು ಕುಪ್ಪಳಿಸಿ ಆಡುವ

ಸೊಗಸಿನಾಟ ಮಾತ್ರ

ಈ ಗಾಳಿಪಟಕ್ಕೇ ಮೀಸಲು.

ಮಗೂ,

ಹಾರುವ, ನಲಿಯುವ ನಿನ್ನ

ಹಂಬಲಕ್ಕೆ,

ಬಯಕೆಯ ಬಣ್ಣದ

ಬಾಲಂಗೋಚಿಗೆ

ಗಾಳಿಯ ನೆರವೊಂದಿರಲಿ

ಸದಾ.

ನೀ ಏರಿದಷ್ಟೂ ಎತ್ತರ

ನಾ ತೂರಿ ಬಿಡುವೆ ದಾರ.

ಥೇಟ್ ಖಲೀಲ್ ಗಿಬ್ರಾನ್‍ನಂತೇ

ಹೇಳುವೆ -

`ಬದುಕಿನ ಬದುಕುವ ಬಯಕೆಯ

ಸೃಷ್ಟಿ ನೀನು

ನನ್ನಿಂದ ಬಂದರೂ ಬರೀ

ನನ್ನದೇನಲ್ಲ ನೀನು.'

ಹಾರು ಮಗೂ ಹಾರು,

ಕೊನೆ ಮೊದಲಿಲ್ಲದ ಆಕಾಶ

ನಿನ್ನ ಅಂಗಳ.

ಮರಳಿ ನೀ ಬಳಿಗೆ ಬಂದಾಗೆಲ್ಲ

ಕೇಳುತ್ತೇನೆ,

`ಏನೆಲ್ಲ ಕಂಡೆ ಕಂದ

ಅಷ್ಟು ಎತ್ತರದಿಂದ?'

ಏನೇನೆಲ್ಲ ನೀ ನುಡಿವ

ಪರಿಗೆ

ನಾನು ಬೆರಗಾಗುವಷ್ಟು

ದಿನ

ಬದುಕಿನ ಬದುಕುವ ಬಯಕೆ

ಜೀವಂತ.

(ಅಮ್ಮನ ಜೊತೆಗೆ ಗಾಳಿಪಟ ಹಾರಿಸುತ್ತಿರೋ ನಿಶು...........ಮೇಲೆ ಹಾರ್ತಿರೋದು ನಮ್ಮ ಗಾಳಿಪಟಾನೆ..)

ಮೂರು ವರ್ಷಗಳ ಹಿಂದೆ ಸರಿ ಸುಮಾರು ಇದೇ ಸಮಯದಲ್ಲಿ ನಿಶು ಹುಟ್ಟುವುದಕ್ಕೆ ಸ್ವಲ್ಪ ದಿನದ ಮುಂಚೆ ಹುಟ್ಟಿದ ಕವನ ಇದು.
`ನಿಮ್ಮಿಂದ ಬಂದರೂ ನಿಮ್ಮವರಲ್ಲ ನಾವು.....ಬದುಕಿನ ಬದುಕುವ ಬಯಕೆಯ ಸೃಷ್ಟಿಗಳು ನಾವು' ಎಂಬ ನನ್ನ ಪ್ರೀತಿಯ ಕವಿ ಖಲೀಲ್ ಗಿಬ್ರಾನ್‍ನ ಸಾಲುಗಳು ಯಾಕೋ ತುಂಬಾ ನೆನಪಿಗೆ ಬರುತ್ತಿದ್ದ ದಿನಗಳು ಅವು. ಕೊಟ್ಟು-ಕೊಳ್ಳುವ ಇಂತಹ ಬಿಡುಗಡೆ ನನ್ನದೂ ಆದೀತು ಒಮ್ಮೆ ಎಂದು ಅಂದುಕೊಳ್ಳುತ್ತಾ........

*********

ಅಂದ ಹಾಗೆ, ಯೂಟ್ಯೂಬ್‍ನಲ್ಲಿ ಒಂದಷ್ಟು ಮಕ್ಕಳ ಪದ್ಯಗಳ(ಕನ್ನಡ) ವೀಡಿಯೋ ನೋಡ್ದೆ. ಕೆಲವು ಚೆನ್ನಾಗಿವೆ. ಏನೇನೆಲ್ಲ ಸರ್ಕಸ್ ಮಾಡಿದರೂ ಇಲ್ಲಿ ಅಪ್‍ಲೋಡ್ ಮಾಡೋಕೆ ಆಗ್ತಿಲ್ಲ. ಸಧ್ಯದಲ್ಲೇ ನಿಮಗೂ ತೋರಿಸುವ ಆಸೆ ಇದೆ. ಈಗಲೇ ನೋಡಬೇಕು ಅನಿಸಿದ್ರೆ ಈ ಲಿಂಕ್ ಟ್ರೈ ಮಾಡಿ.

ಬ್ಲಾಗ್ ಅಪ್ಡೇಟ್ ಮಾಡು ಅಂತ ಕಾಮೆಂಟಿಸಿ, ನನಗೇ ನೇರ ಹೇಳಿ ನನ್ನನ್ನ ಎಬ್ಬಿಸಿದ ನಿಮಗೂ, ನಿಶೂನ ಅಜ್ಜಿ, ತಾತಂಗೂ ಥ್ಯಾಂಕ್ಸ್ ಹೇಳ್ತಾ, ನಿಮ್ಮಿಂದಲೇ ಈ ಬ್ಲಾಗು ಆಗೀಗ ಉಸಿರಾಡ್ತಾ ಇರೋದು ಅಂತ ಹೇಳ್ತಾ....ಬಹುಷಃ ಮುಂದಿನ ಪೋಸ್ಟ್ ಇಷ್ಟು ತಡವಾಗ್ಲಿಕ್ಕಿಲ್ಲ ಅಂತ ಸುಳ್ಳು ಸುಳ್ಳೇ ಭರವಸೆ ಕೊಟ್ಟುಬಿಡ್ಬೇಕು ಅನ್ನೋ ಆಸೆಯನ್ನ ಅದುಮಿಟ್ಟುಕೊಳ್ಳುತ್ತಾ ಈ ಪೋಸ್ಟ್ ಮಾಡ್ತಿದ್ದೀನಿ.

ಗೇರ್ ಗೇರ್ ಮಂಗಣ್ಣ.....

2008-02-28T15:21:00.012-05:00

ಗೇರ್ ಗೇರ್ ಮಂಗಣ್ಣ,

ಕಡ್ಲೆಕಾಯ್ ತಿನ್ನಣ್ಣ,

ಬಾಳೆಹಣ್ಣು ನುಂಗಣ್ಣ,

ಅಲ್ಲಿಂದಿಲ್ಲಿಗೆ ಹಾರಣ್ಣ,

ಲಂಕಾಪಟ್ಣ ಸೇರಣ್ಣ,

ಸೀತೆಯನ್ನು ಹುಡುಕಣ್ಣ,

ಭೇಷ್ ಭೇಷ್ ಮಂಗಣ್ಣ!

ಶಿಶುವಿಹಾರದಲ್ಲಿದ್ದಾಗ ನೀವೂ ಈ ಹಾಡು ಕಲಿತಿದ್ರ?

ಕ್ಯೂರಿಯಸ್ ಜಾರ್ಜ್ ಜೊತೆ ನೀವೂ ಮಂಗಾಟ ಆಡ್ಬೇಕಂದ್ರೆ ಇಲ್ಲಿ ಹೋಗ್ಬೋದು.

ನಮ್ಮನೆ ಪುಟ್ಟಣ್ಣ

2008-01-28T00:22:00.000-05:00

ನಿಶುಮರಿ

ಅಮ್ಮ ಅಂದ್ರೆ ತುಂಬಾ ಇಷ್ಟ

ಅಮ್ಮನ ಕೆನ್ನೇಗ್ ಮುತ್ತು

ಕೊಟ್ಟು, ಕೂಡ್ಲೇ ಕೇಳುತ್ತಾನೆ,

'ಕೊಡ್ತೀಯಾ ಬಿಸ್ಕತ್ತು?'

ಅಪ್ಪನ ಕಂಡ್ರೂ ತುಂಬಾ ಪ್ರೀತಿ

ಅಪ್ಪಾನೇ ಬೆಸ್ಟ್ ಫ್ರೆಂಡು,

ಮನೆಯೊಳಗೇನೇ ಆಡ್ತಿರ್ತಾರೆ

ಇಬ್ರೂನೂ ಕಾಲ್ಚೆಂಡು!

ನನ್ನ ಚಿನ್ನ ನನ್ನ ರನ್ನ

ದಿನವೂ ಒಂದೊಂದ್ ಬಣ್ಣ

ಹಚ್ಕೊಂಡ್ ಬರ್ತಾನ್ ಅಂಗೀಗೆಲ್ಲಾ

ಡೇಕೇರಿಂದ ಚಿಣ್ಣ.

ಬೇಕೇಬೇಕು ಕೇಳಿದ್ದೆಲ್ಲಾ

ಕೊಡ್ದೆ ಇದ್ರೆ ಟೂ..ಟೂ ..

ಹುಬ್ಬು ಕೊಂಕಿಸಿ, ಕೆನ್ನೆ ಉಬ್ಬಿಸಿ

ಮೂಲೇಲ್ ನಿಲ್ತಾನ್ ಛೋಟೂ.

ಯಾಕೆ?, ಏನು?, ಹ್ಯಾಗೆ?, ಎಲ್ಲಿ?

ಎಷ್ಟೊಂದಿದೆ ಪ್ರಶ್ನೆಗಳು!

ಉತ್ರ ಹೇಳೀ ಹೇಳೀ

ನಂತಲೆಯಾಯ್ತು ಸಾವಿರ ಹೋಳುಗಳು.

ಕಾ ಕಾ ಕಾಗೆ

2008-01-04T18:02:00.000-05:00

ನೀರು ಮೇಲೆ ಬರಲಿಕ್ಕೆ ಹೂಜಿ ತುಂಬಾ ಕಲ್ಲು ತಂದು ಹಾಕಿದ ಜಾಣ ಕಾಗೆಯ ಹಾಗೇ ನರಿ ಹೊಗಳಿದ್ದಕ್ಕೆ ಬಾಯಿಬಿಟ್ಟು, ಕಜ್ಜಾಯ ಕಳೆದುಕೊಂಡ ಕಾಗೆಯೂ ನನಗಿಷ್ಟ. ಹಾಗೆ ಕಾಗೆ ಇಷ್ಟವಾಗಲಿಕ್ಕೆ ಕಾರಣ, ಚಿಕ್ಕವಳಿದ್ದಾಗ ನಾನು ಓದಿದ ರಾಜರತ್ನಂರ ಕಾಗೆಯ ಕುರಿತ ಪದ್ಯ ಮತ್ತು ನಂತರದ ದಿನಗಳಲ್ಲಿ ಮೆಚ್ಚಿಕೊಂಡ ಆರ್. ಕೆ. ಲಕ್ಷ್ಮಣರ ಕ್ಯಾರಿಕೇಚರ್ ಕಾಗೆ. ಈಗ ಹತ್ತು ವರ್ಷಗಳ ಕೆಳಗೆ ಪನ್ನೇರಳೆ ಹಣ್ಣಿಗಾಗಿ ಮರ ಹತ್ತಿ, ಅದೇ ಮರದಲ್ಲಿ ಗೂಡು ಕಟ್ಟಿದ್ದ ಕಾಗೆಯೊಂದರ ಕೈಲಿ(ಕೊಕ್ಕಲ್ಲಿ!) ಬೆರಳಿಗೆ ಕುಟುಕಿಸಿಕೊಂಡು ಗಾಯ ಮಾಡಿಕೊಂಡಿದ್ದು ನೆನಪಾಗ್ತಿದೆ. ಆ ಕಾಗೆಯಂತೂ ಲಕ್ಷ್ಮಣರ ಕಾಗೆಗಿಂತ ಹೆಚ್ಚಿನ ಪರ್ಸನಾಲಿಟಿ ಹೊಂದಿತ್ತು ಅನ್ನಿಸ್ತಿದೆ.

ರಾಜರತ್ನಂ ಪದ್ಯ ಇಲ್ಲಿದೆ:

ಕರ್ರಗಿರುವ ಕಾಗೆಯೊಂದು,

ಭರ್ರ್ ಎಂದು ಹಾರಿ ಬಂದು,

ಸರ್ರ್ ಎಂದು ಸುತ್ತಿ ತಿರುಗಿ

ಕೆಳಗೆ ನೋಡಿತು.

ಸರ್ರ್ ಎಂದು ಸುತ್ತಿ ತಿರುಗಿ,

ಜರ್ರ್ ಎಂದು ಜಾರುವಾಗ,

ಪರ್ರ್ ಎಂದು ಅದರ ರೆಕ್ಕೆ

ಹರಿದು ಹೋಯಿತು.

ದ್ವಿತೀಯಾಕ್ಷರ ಪ್ರಾಸದ ಈ ಪದ್ಯ ನನಗೂ, ನಿಶೂಗೂ ಅಚ್ಚುಮೆಚ್ಚು. `ಕಂದನ ಕಾವ್ಯ' ಅನ್ನೋ ಹೆಸರಿನ ಪುಸ್ತಕದಲ್ಲಿರೋ ಈ ಪದ್ಯವನ್ನ ನನಗೆ ನೆನಪಲ್ಲಿ ಇರುವ ಹಾಗೆ ಬರೆದಿದ್ದೀನಿ. ಇದರ ಸರಿಯಾದ ಪಾಠ ಯಾರಿಗಾದರೂ ಗೊತ್ತಿದ್ದಲ್ಲಿ ಕಳುಹಿಸಿಕೊಡಿ.

*****

ಈ ಕಾಗೆ ಪದ್ಯ ನನಗೆ ನೆನಪಾಗಲಿಕ್ಕೆ ಕಾರಣರಾದವರು, ನಿಶುಮನೆಗೆಂದು ತಮಗೆ ಸಿಕ್ಕ ಪದ್ಯವೊಂದನ್ನ ನನಗೆ ಕಳುಹಿಸಿಕೊಟ್ಟ ಶೀಲಾ. ಅವರಿಗೆ ಧನ್ಯವಾದ. `ಕ' ಅಕ್ಷರದ ಕಾಗುಣಿತವನ್ನ ಆಧರಿಸಿ ಬರೆದಿರುವ ಈ ಪದ್ಯದ ಕಡೆಯ ಸಾಲಿನ ಅರ್ಥ ನನಗೆ ತಿಳಿಯಲಿಲ್ಲ. 'ಕಃಫಿಕ' ಎಂದರೆ ಏನೆಂದು ನನಗೆ ಗೊತ್ತಿಲ್ಲ. ಕಡೆಯ ಸಾಲಿನಲ್ಲಿ 'ಕಃ' ಬರಬೇಕೆಂಬ ಕಾರಣಕ್ಕೆ ಹಾಗೆ ಬರೆದಿದ್ದಾರ? ನಿಮಗ್ಯಾರಿಗಾದರೂ ಗೊತ್ತಿದ್ದರೆ ತಿಳಿಸಿಕೊಡಿ

****

ಶೀಲಾ ಅವರು ನನಗೆ ಬರೆದದ್ದು ಇಲ್ಲಿದೆ:

ಮೀರಾ, ಇದು ನನಗ "ಸುಧಾ" ಪತ್ರಿಕೆಯಲ್ಲಿ ಸಿಕ್ಕಿತು. ಓದಿದ ಕೂಡಲೆ ನಿಮ್ಮ ನೆನಪಾಯಿತು. ಇಲ್ಲಿ ಅಂಟಿಸಿದ್ದೇನೆ. ಆಕರ್ಷಕವಾಗಿ ಮಾಡಿ ನಿಮ್ಮ ಬ್ಲಾಗಿನಲ್ಲಿ ಹಾಕುವುದಾದರೆ ಹಾಕಿ.

ಕ, ಕಾ....ಬಳ್ಳಿ

ಕಪ್ಪಿನ ಬಣ್ಣದ ಹಕ್ಕಿಯು ಅಹ!ಹಾ!
ಕಾ ಕಾ ಎನ್ನುತ ಹಾರುತಿದೆ.
ಕಿಟ್ಟನ ಮನೆಯ ಅಂಗಳದಲ್ಲಿಹ ಕೀಟಗಳನದು ತಿನ್ನುತಿದೆ.

ಕುಲವೇ ಕಲಿತಹ ಹಿರಿಗುಣವೊಂದಿದೆ

ಕೂಟವ ಕಟ್ಟುವ ಓ ಬುದ್ಧಿ.

ಕೆಲಸದಿ ಶ್ರದ್ಧಾಭಕ್ತಿಯು ತುಂಬಿದೆ ಕೇಳಿರಿ ನಿಮಗಿದು ಸದ್ಬುದ್ಧಿ.

ಕೈಗದು ಬಾರದು ದಾಸ್ಯವನೊಪ್ಪದು

ಕೊಟ್ಟೇ ತಿಂಬುದ ಯೋಚಿಸಿರಿ.

ಕೋಗಿಲೆಯಂಥಾ ಮೈ ಬಣ್ಣದ ಅದು

ಕೌ ಎನ್ನಲು ಕಲ್ಲೆಸಯದಿರಿ

ಕಂಠವು ಕರ್ಕಶವಾದರೂ ಕಾಗೆಯು

ಕಃಫಿಕವಲ್ಲೈ ಹಳೆಯದಿರಿ.

ಎಲ್. ಎಸ್. ಹೆಗಡೆಯವರು ಅವರ ಶಿಕ್ಷಕರು ೪೫ ವರ್ಷಗಳ ಹಿಂದೆ ಹೇಳಿಕೊಟ್ಟದ್ದನ್ನು ಸುಧಾ ಪತ್ರಿಕೆಗೆ ಕಳುಹಿಸಿಕೊಟ್ಟಿದ್ದಾರೆ.

- ಶೀಲಾ.

ಕಾಗೆ ಹಾಡು ಇಲ್ಲಿದೆ!

2008-01-04T07:54:00.000-05:00

ಹೊಸವರ್ಷಕ್ಕೆ ಶುಭ ಹಾರೈಸುವ ಮೊದಲೇ ಡ್ರಾಫ್ಟ್ ಮಾಡಿದ್ದ 'ಕಾ ಕಾ ಕಾಗೆ' ಹೆಸರಿನ ನನ್ನ ಪೋಸ್ಟ್, ಏನು ಮಾಡಿದರೂ recent post ಅಂತ ಎಲ್ಲಕ್ಕಿಂತ ಮೇಲೆ ಹಾಕಲು ಆಗ್ತಿಲ್ಲ. ಹೊಸವರ್ಷದ ಪುಟ ಸ್ಕ್ರಾಲ್ ಮಾಡುತ್ತ ಕೆಳಗಿಳಿದರೆ, ನೀವಿದನ್ನ ನೋಡಬಹುದು. ನೋಡಿ, ಕಾಮೆಂಟಿಸಿ.

ಈ ಸಮಸ್ಯೆಗೆ ಚೇತನ್ ಪರಿಹಾರ ಸೂಚಿಸಿ, ಇದು 'ರೀಸೆಂಟ್ ಪೋಸ್ಟ್' ಆಗುವ ಹಾಗೆ ಮಾಡಿದ್ದಾರೆ. ಕಾಗೆ ಬುದ್ಧಿವಂತಿಕೆಯಿಂದ ಹೂಜಿಯಲ್ಲಿ ನೀರು ಮೇಲೆ ಬಂದ ಹಾಗೇ ಈ ಬರಹವೂ ಮೇಲೆ ಬಂದಿದೆ. ಚೇತನ್-ಗೆ ಥ್ಯಾಂಕ್ಸ್ ಹೇಳುತ್ತಾ, ಕೆಲವಂ ಬಲ್ಲವರಿಂದ ಕಲಿಯುವ ಖುಶಿ ಅನುಭವಿಸುತ್ತಾ......

HAPPY NEW YEAR

2008-01-01T09:53:00.000-05:00

ಎಲ್ಲರಿಗೂ ಹೊಸವರ್ಷದ ಶುಭಾಶಯಗಳು

ಹೊಸವರ್ಷ ಹ್ಯಾಗೆ ಬರತ್ತೆ? ಆನೆ ಹತ್ತಿ ಬರತ್ತಾ?..ಅಂತ ನಿಶು ಕೇಳ್ತಿದ್ದಾನೆ. ನಾನು, ಇವನು ಇಬ್ರೂ 'ಹೌದು' ಅಂತ ಹೇಳಿದ್ದೇವೆ.

ಉಂಡಾಡಿ ಗುಂಡ

2007-12-08T10:04:00.000-05:00

ಉಂಡಾಡಿ ಗುಂಡನ ಹಾಡು ಗೊತ್ತಾ ನಿಮ್ಗೆ? ಇನ್ನೂ ಬೇಕು, ಇನ್ನೂ ಬೇಕು ಅಂತ ತಿಂತಾನೇ ಇದ್ರೆ, ಏನಾಗತ್ತೆ ಗೊತ್ತು ತಾನೆ!

ಉಂಡಾಡಿ ಗುಂಡ

ಆಲೂಗೆಡ್ಡೆ ಬೋಂಡ

ಮದ್ವೆ ಮನೇಗ್ ಹೋದ

ಹತ್ತು ಲಾಡು ತಿಂದ

ಹೊಟ್ಟೆ ನೋವು ಎಂದ

ಅಮ್ಮ ಬೆಣ್ಣೆ ಕೊಟ್ಟಳು

ಇನ್ನೂ ಬೇಕು ಅಂದ

ಅಪ್ಪ ದೊಣ್ಣೆ ತಂದನು

ಕೈ ಕಟ್, ಬಾಯ್ ಮುಚ್ಚ್

ಗಪ್ ಚಿಪ್ ಶ್..............

ಕಥೆ : ರಾಜನ ಕಷ್ಟ

2007-11-11T10:11:00.000-05:00

ಮಕ್ಕಳ ಕಥೆಗಳು ಹೇಗಿರಬೇಕು? ನೀತಿ ಬೋಧಿಸಲೆಂದೇ ಅದಕ್ಕೊಂದು ಕಥೆ ಹೆಣೆದು, ನೀತಿಯ ಭಾರದಿಂದ ಜಗ್ಗುವ ಕಥೆಗಳು ತೀರಾ ಪುಟ್ಟ ಮಕ್ಕಳಿಗೆ ಬೇಕ? ಅಥವ ಸುಮ್ಮನೆ ಅವರ ಕುಥೂಹಲ ಕೆರಳಿಸುವ, ಕಣ್ಣು ಅರಳಿಸುವ, ಕಲ್ಪನೆ ಗರಿಗೆದರಿಸುವ, ನಿರ್ದಿಷ್ಟ ನಿಯಮ, ಬಂಧ ಯಾವುವೂ ಇರದ ಕಥೆಗಳು ಬೇಕ? ನನಗೇನೋ ಈ ಎರಡನೆ ಮಾದರಿಯವೇ ಇಷ್ಟ. ಅದರಲ್ಲೂ ನಾನು ಹೇಳುವ ಕಥೆಗಳಲ್ಲಿ, ನಿಶುವನ್ನೇ ಒಂದು ಪಾತ್ರವಾಗಿಸಿ, ಅವನು ಆಡುವಂಥದ್ದೇ ಮಾತುಗಳನ್ನ ಹಾಕಿ, ಕಥೆ ಕೇಳುವಾಗ ಚೂರೇ ಬಿಡುವ ಅವನ ಬಾಯಿ, ಅರಳುವ ಅವನ ಕಣ್ಣು, ಮುಖ ನೋಡುತ್ತ, ಕಥೆಯನ್ನ ಇನ್ನೂ ಇನ್ನೂ 'ಸಿಲ್ಲಿ'ಯಾಗಿಸುತ್ತಾ, ಅವನನ್ನ ನಗಿಸುತ್ತಾ ಹೋಗೋದು ಅಂದರೆ ನನಗೆ ತುಂಬಾ ಇಷ್ಟ. ಅಂತ ಒಂದು ಕಥೆ ಇಲ್ಲಿ ನಿಮ್ಮೊಂದಿಗೆ ಹಂಚಿಕೊಳ್ಳೋಣ ಅಂತ....

ರಾಜನ ಕಷ್ಟ

ಒಂದೂರಲ್ಲಿ ಒಬ್ಬ ರಾಜ ಇದ್ದ. ಅವನಿಗೆ ಮೂರು ಜನ ಮಕ್ಕಳು. ಮೊದಲನೆ ಮಗು ಹೆಸ್ರು 'ನಿ' ಅಂತ. ಎರಡನೆ ಮಗು 'ಶಾಂ', ಮೂರನೇ ಮಗು, 'ತ್'. ಮೂರೂ ಮಕ್ಕಳನ್ನೂ ಒಟ್ಟಿಗೇ ಕರೆಯುವಾಗ ಆ ರಾಜ ಅವರ ಹೆಸರನ್ನೆಲ್ಲ ಒಟ್ಟಿಗೆ ಸೇರಿಸಿ 'ನಿಶಾಂತ್.....' ಅಂತ ಕೂಗ್ತಿದ್ದ. ಹಾಗೆ ಅವನು ಕೂಗಿದಾಗೆಲ್ಲ 'ನಿ', 'ಶಾಂ', 'ತ್' ಮೂರೂ ಮಕ್ಕಳೂ ಓಡಿ ಓಡಿ ಬರ್ತಿದ್ರು. ಜೊತೆಗೆ ಈ 'ನಿಶಾಂತ್' ಕೂಡ ಓಡಿ ಹೋಗಿ ರಾಜನ ಮುಂದೆ ನಿಂತುಬಿಡ್ತಿದ್ದ. ರಾಜ ಇವನನ್ನ ನೋಡಿ ಕೇಳ್ತಿದ್ದ,

'ನಾನು ಕರೆದಿದ್ದು ನನ್ನ ಮಕ್ಕಳನ್ನ. ನೀನ್ಯಾಕಪ್ಪ ಬಂದೆ?'

ಅದಕ್ಕೆ ನಿಶಾಂತ್ ಹೇಳ್ತಿದ್ದ,

'ಮತ್ತೆ ನೀವು ನಿಶಾಂತ್ ಅಂತ ಕೂಗಿ ಕರೆದ್ರಲ್ಲ, ಅದು ನನ್ನ ಹೆಸ್ರು. ನೀವು ಹಾಗೆ ಕರೆದಿದ್ದಕ್ಕೆ ಬಂದೆ'.

ಪ್ರತಿ ಸಲವೂ ಹೀಗೇ ಆಗ್ತಿತ್ತು. ರಾಜ ಅವನ ಮಕ್ಕಳನ್ನ ಒಟ್ಟಿಗೆ ಕೂಗಿ ಕರೆದಾಗೆಲ್ಲ, ಆ ಮೂರು ಮಕ್ಕಳ ಜೊತೆ ನಿಶಾಂತ್ ಕೂಡ ಹೋಗಿ ನಿಂತು ಬಿಡ್ತಾನೆ. ಕೇಳಿದ್ರೆ,
'ನೀವು ನನ್ನ ಹೆಸ್ರನ್ನೇ ತಾನೆ ಕೂಗಿದ್ದು' ಅಂತಾನೆ.

ರಾಜನಿಗೆ ದೊಡ್ಡ ಪಜೀತಿ. ಅವನಿಗೆ ಹೀಗಾದಾಗಲೆಲ್ಲ ಏನ್ ಮಾಡಬೇಕು ಅಂತ ಗೊತ್ತಾಗ್ದೆ ತಲೆ ಮೇಲೆ ಕೈ ಹೊತ್ತು ಕುಳಿತು ಬಿಡ್ತಾನೆ. ಆ ದೊಡ್ಡ ರಾಜನ ಪಜೀತಿ ನೋಡಿ ಈ ನಾಲ್ಕು ಮಕ್ಕಳಿಗೂ ಜೋರಾಗಿ ನಗು ಬಂದು ಬಿಡತ್ತೆ. ಜೋರಾಗಿ ನಗ್ತಾ, ಹೋ ಅಂತ ಕೂಗ್ತ ಈ ಮಕ್ಕಳೆಲ್ಲ ಆ ರಾಜನ ಅರಮನೆಯೊಳಗೆಲ್ಲ ಗಲಾಟೆ ಮಾಡ್ಕೊಂಡು ಆಟ ಆಡೋಕೆ ಶುರು ಮಾಡ್ತಾರೆ.

- - - - - - - - - - - - - - - - - - - - - - - - - - -

ಈ ಕಥೆ ಬರೆಯುವಾಗ ನನಗೆ ಕನ್ನಡದಲ್ಲಿ ೩ ಎಂಬುದನ್ನ ಅಕ್ಷರದಲ್ಲಿ ಬರೆಯೋದಕ್ಕಾಗ್ದೆ ಸಾಕಷ್ಟು ಒದ್ದಾಡಿದ್ದಾಯ್ತು. ಕಡೆಗೂ 'ಮೂರು' ಅಂತಲೇ ಟೈಪ್ ಮಾಡಬೇಕಾಯ್ತು. ಬರಹದಲ್ಲಿ ಸರಿಯಾಗಿ ಬರೆಯೋಕ್ಕಾದ್ರೂ ಅದನ್ನ ಬ್ಲಾಗ್-ಗೆ ಹಾಕುವಾಗ ಪ್ರತಿಬಾರಿಯೂ 'ಮೂರು' ಅಂತಲೇ ಬರ್ತಿದೆ. ಓದುವಾಗ ನೀವು ಸರಿಯಾಗಿ ಓದಿಕೊಂಡುಬಿಡಿ ಮತ್ತು ನಿಮಗೆ ಯಾರಿಗಾದರೂ ಇದನ್ನ ಹ್ಯಾಗೆ ಸರಿ ಮಾಡೋದು ಗೊತ್ತಿದ್ರೆ ದಯವಿಟ್ಟು ತಿಳಿಸಿಕೊಡಿ.

'ಮೂ' ಸರಿ ಹೋಯ್ತು!

ಈ ಪೋಸ್ಟ್ ಹಾಕಿದ ೨೪ ಘಂಟೆ ಒಳಗೇ ನನಗೆ 'ಮೂ' ಸಮಸ್ಯೆಗೆ ಪರಿಹಾರ ಸಿಕ್ಕಿಬಿಡ್ತು. ಕನ್ನಡ ಬ್ಲಾಗಿಗರು ಎಷ್ಟು active-ಆಗಿ ಇದ್ದಾರಲ್ಲ ಅನ್ನಿಸಿ ತುಂಬಾ ಖುಷಿ ಆಗ್ತಿದೆ. ಅದಕ್ಕೆ ದಿನೇ ದಿನೇ ಕನ್ನಡ ಅರಳಿಕೊಳ್ತಾ ಇದೆ, ವೆಬ್ ಲೋಕದಲ್ಲಿ. ಪರಿಹಾರ ಸೂಚಿಸಿದ ಶ್ರೀ, ಸುಶ್ರುತ ಇಬ್ಬರಿಗೂ ತುಂಬಾ ಥ್ಯಾಂಕ್ಸ್.

- - - - - - - - - - - - - - - - - - - - - - - - - - - - - - - - - -

ನಿಶೂಗೆ ತುಂಬಾ ಇಷ್ಟವಾದ ಕಥೆಯೊಂದು ಇಲ್ಲಿದೆ. ನೀವೂ ನೋಡಿ.

ತಾಚಿ ಮಾಡ್ತಿರೋ ನಿಶುಮನೆಯಲ್ಲಿ ಒಂದು ಲಾಲಿಹಾಡು

2007-09-13T12:02:00.000-04:00

Indiaದಿಂದ ನಮ್ಮತ್ತೆ ಬಂದಿದ್ದಾರೆ. ಸಿಕ್ಕಾಪಟ್ಟೆ ಕೆಲ್ಸ. cooking-cleaning ಚಕ್ರದಲ್ಲಿ ಸುತ್ತುಹೊಡೀತಿರೋ ನಂಗೆ ಬೇರೆ ಯಾವ ಕೆಲ್ಸಕ್ಕೂ ಸಮಯಾನೇ ಸಿಗ್ತಿಲ್ಲ. ಹೀಗಾಗಿ ನಿಶುಮನೆ ಸ್ವಲ್ಪ ದಿನದಿಂದ ನಿದ್ದೆ ಮಾಡ್ತಿದೆ. 'ಯಾಕೆ update ಮಾಡ್ತಿಲ್ಲ' ಅಂತ ನೀವೆಲ್ಲ ಹೀಗೇ ಆಗಾಗ ಒಂಚೂರು ಚುಚ್ಚಿ ಎಚ್ಚರಿಸ್ತಾ ಇರಿ.....

ಈ ಮಲಗಿರೋ ಡೈನೋಸಾರನ್ನ ಎಬ್ಬಿಸೋದು ಹ್ಯಾಗೆ?

ಕುಲಾವಿ ಹೆಣೆಯೋಕೆ ಬರದ ಈ ಅಮ್ಮ, ನಿಶು ಹುಟ್ಟೋಕೆ ಮುಂಚೆ ಅವನಿಗೆ ಅಂತ ಹೆಣೆದಿದ್ದು ಈ ಲಾಲಿಹಾಡು. thatskannadaದಲ್ಲಿ ಪ್ರಕಟವಾಗಿದ್ದ ಈ ಹಾಡು ಇಲ್ಲಿ ಮತ್ತೆ ಕೊಡ್ತಿದ್ದೀನಿ, ನಿಶುವಿನ ಕೆಲವು ಹಳೆಯ ಚಿತ್ರಗಳ ಜೊತೆಗೆ. ನಿಮಗೆ ಇಷ್ಟವಾಯ್ತಾ ಇಲ್ವಾ ತಿಳಿಸ್ತೀರಾ?

ಲಾಲಿಹಾಡು
_______

ಮುತ್ತಿನಾರತಿ ತಂದು ಎತ್ತಿ ಬೆಳಗೀರೇ.....
ಮುದ್ದು ಮಾತಾಡೊ ನನ್ನರಗಿಳಿಗೆ ಕಂದಂಗೆ
ಮುತ್ತಿನಂಥಾ ನನ್ನ ಮಗುವೀಗೆ.........
ಜೋ..ಜೊ........ಜೋ...ಜೊ..............

ಮಣ್ಣೀನ ಗಂಧಾಕೆ ಸೋಲುವಾ ಮನಸಿರಲಿ
ಹಕ್ಕಿಯಂತೆ ಹಾರೊ ಕನಸಿರಲಿ ಕಣ್ತುಂಬ
ನಕ್ಷತ್ರದಾ ಬೆಳಕು ತುಂಬಿರಲೀ..........
ಜೋ...ಜೊ........ಜೋ....ಜೊ..........

ಉರಿಯುವಾ ನೇಸರ ತಣ್ಣಾನೆ ಚಂದಿರ
ಹಾಡು ಹಕ್ಕಿಯು ಹಸಿರು ಇರುವಂಥ ಈ ನೆಲವು
ನಿನ್ನ ನಗುವಿಂದಲೆ ಚೆಲುವಾಯಿತು............
ಜೋ...ಜೊ........ಜೋ.....ಜೊ...........

ಮುತ್ತಿನಾ ಮಣಿ ನೀನು ಮುದ್ದಿನಾ ಗಿಣಿ ನೀನು
ಹೊನ್ನಿನಾ ಗಣಿ ನೀನು ನನ್ನೆದೆಗೆ ಕಂದಯ್ಯ
ಬಣ್ಣಾದ ರಂಗೋಲಿ ಅಂಗಳಕೇ............
ಜೋ...ಜೊ..........ಜೋ...ಜೊ.............

ಮುದ್ದು ಕನ್ನಡ

2007-08-08T13:14:00.000-04:00

ವರ್ಷಗಳ ಹಿಂದೆ ಹೀಗೇ ಸುಮ್ಮನೇ ವೆಬ್-ನಲ್ಲಿ ಸುತ್ತು ಹೊಡೀತ, ಮಕ್ಕಳಿಗೆ ಅಂತ ಕನ್ನಡ ಅಂತರ್ಜಾಲದಲ್ಲಿ ಏನೇನಿದೆ ಅಂತ ಹುಡುಕಿ, ಅಂಥಾದ್ದೇನೂ ಸಿಕ್ಕದೆ ನಿರಾಶೆಯಾಗಿತ್ತು. ಮಕ್ಕಳಿಗೆ ಸಂಬಂಧಿಸಿದ ವೆಬ್-ಸೈಟುಗಳೂ, ಬ್ಲಾಗ್-ಗಳೂ ಕನ್ನಡದಲ್ಲಿ ಇಲ್ಲವೇ ಇಲ್ಲ ಅನ್ನಿಸುವಷ್ಟು ಕಡಿಮೆ ಇರೋದು ಗಮನಕ್ಕೆ ಬಂತು. ಕೆಲವು ಇಂಡಿಯನ್ ಪೇರೆಂಟಿಂಗ್ ಸೈಟ್-ಗಳಲ್ಲಿ ಬೇರೆ ಭಾರತೀಯ ಭಾಷೆಗಳ ಜೊತೆಗೆ ಕನ್ನಡ ಅಕ್ಷರ ಮಾಲೆಯೋ, ಒಂದೆರಡು ಕತೆ-ಕವಿತೆಯೋ ಇರೋದು ಬಿಟ್ಟರೆ ಹೆಚ್ಚಿಗೆ ಆಸಕ್ತಿ ಹುಟ್ಟಿಸುವಂಥಾದ್ದೇನೂ ಕಾಣಲೇ ಇಲ್ಲ. ಇನ್ನೊಮ್ಮೆ ಈ ಅಂತರ್ಜಾಲವನ್ನೆಲ್ಲ ಜಾಲಾಡಿ ಸಧ್ಯದಲ್ಲೇ ಒಂದಿಷ್ಟು links ಕೊಡುವ ಯೋಚನೆ ಇದೆ. ನಿಮ್ಮಲ್ಲಿ ಯಾರಿಗಾದರೂ ಮಕ್ಕಳಿಗೆ ಸಂಬಂಧಿಸಿದ ಕನ್ನಡದಲ್ಲಿರುವ ವೆಬ್ ತಾಣಗಳು ಗಮನಕ್ಕೆ ಬಂದಲ್ಲಿ ದಯವಿಟ್ಟು ಇಲ್ಲಿ ಹಂಚಿಕೊಳ್ಳಿ.
ಸಮಯ ಸಿಕ್ಕಾಗ, ಮೂಡ್ ಬಂದಾಗ ಅಂತ ಅಪ್ಡೇಟ್ ಆಗಲು ನೂರಾರು ನೆಪಗಳನ್ನಿಟ್ಟುಕೊಂಡಿರುವ ಈ 'ನಿಶುಮನೆ'ಯಂತಲ್ಲದೆ, ಸಾಕಷ್ಟು active ಆದ ಒಂದಿಷ್ಟು ಮಕ್ಕಳ ಬ್ಲಾಗುಗಳು ಕನ್ನಡದಲ್ಲಿ ಶುರುವಾದರೆ ಚೆನ್ನಾಗಿರತ್ತಲ್ಲ ಅನ್ನಿಸುತ್ತಿರುವಾಗಲೇ, 'ನಂದಗೋಕುಲ'ವೊಂದು ಬಾಗಿಲು ತೆರೆದಿದೆ. ಈಗಾಗಲೇ 'ಚಿತ್ರದುರ್ಗ'ದಂತ ಸುಂದರ, ಚಟುವಟಿಕೆಯ ಬ್ಲಾಗಿನ ಒಡತಿಯಾಗಿದ್ದ ನನ್ನ ಪ್ರೀತಿಯ ಗೆಳತಿ, ಈಗ ಪುಟಾಣಿ ಅಮರ್ತ್ಯನನ್ನ ಕಂಕುಳಲ್ಲಿ ಎತ್ತಿಕೊಂಡೆ ಅವನಿಗೆ ಒಂದು ಬ್ಲಾಗ್ ಮಾಡಿದ್ದಾಳೆ. ಅವಳ ಕಣಜದಲ್ಲಿರೋ ನೂರಾರು ಕನ್ನಡ, ಇಂಗ್ಲಿಷ್ ಸರಕುಗಳು ನಂದಗೋಕುಲದ ಮೂಲಕ ಮಕ್ಕಳಿಂದ ಹಿಡಿದು ಮುದುಕರ ತನಕ ಎಲ್ಲರಿಗೂ ಸಿಗುವಂತಾಗಲಿ ಮತ್ತು ಹಾಗಾಗಲು ಈ ನಂದಗೋಕುಲದ ಕೃಷ್ಣ ಅವನ ಅಮ್ಮನಿಗೆ ಸಾಕಷ್ಟು ಸಮಯ, ಸ್ಪೂರ್ತಿ ಕರುಣಿಸಲಿ ಅಂತ ಪ್ರೀತಿಯಿಂದ ಹಾರೈಸುತ್ತಾ......

ಅಂದ ಹಾಗೆ ಮಕ್ಕಳಿಗೆ ಕನ್ನಡವನ್ನೇ ಆಗಲಿ, ಇನ್ನೇನನ್ನೇ ಆಗಲಿ ಕಲಿಯೋ ಆಸಕ್ತಿ ಬರಿಸೋದು ಹ್ಯಾಗೆ? ನಾನು ಮಾಡಿದ್ದು ಹೀಗೆ: ನಿಶು ಸಣ್ಣ ಮಗುವಿದ್ದಾಗಿನಿಂದ ಅವನಿಗಂತ ಹಾಡುತ್ತಿದ್ದ ಹಾಡುಗಳಲ್ಲಿ English, ಕನ್ನಡ ವರ್ಣಮಾಲೆಯನ್ನೂ ಸೇರಿಸಿಕೊಳ್ತಿದ್ದೆ. ಇದ್ದಕ್ಕಿದ್ದಂತೆ ಒಂದು ದಿನ ತಾನಾಗೆ ನನ್ನ ಜೊತೆ ಹಾಡಲಿಕ್ಕೆ ಶುರು ಮಾಡಿದ ನಿಶು, ೧೩-೧೪ ತಿಂಗಳ ಮಗುವಿರುವಾಗಲೇ ಎಲ್ಲಾ English-ಕನ್ನಡ ಅಕ್ಷರಗಳನ್ನೂ ಹಾಡುತ್ತಿದ್ದ. Of-course, ಈಗಲೂ 'ರ' ಹೊರಳದ ಅವನ ನಾಲಿಗೆಯಲ್ಲಿ ಯರಲವ, ಯಲಲವ ಆಗೇ ನಲಿಯೋದು. ಕೆಲವೊಮ್ಮೆ ಅದು ಯಲವಲ-ವೂ ಆಗಿ, ಹಾಗೆ ಆದಾಗಲೆಲ್ಲ 'ಅಯ್ಯೊ ಈ ಕನ್ನಡ ಅಕ್ಷರ ಮಾಲೆ ಎಷ್ಟು ಮುದ್ದಾಗಿದೆಯಲ್ಲ' ಅನ್ನಿಸಿ, ನಿಶುವಿನ ಮೇಲೂ, ಕನ್ನಡದ ಮೇಲೂ ಒಟ್ಟೊಟ್ಟಿಗೇ ಮುದ್ದು ಉಕ್ಕಿ ಬರುವುದೂ ಉಂಟು.

ನೀವು ನಂಬ್ತೀರೋ ಇಲ್ವೋ ಗೊತ್ತಿಲ್ಲ, ನಿಶೂಗೆ ಕನ್ನಡ ಕಾಗುಣಿತ ಯಾರೂ ಹೇಳಿ ಕೊಟ್ಟಿದ್ದಲ್ಲ. ಒಂದೇ ಒಂದು ಬಾರಿ ನಾನು 'ಕ' ಅಕ್ಷರದ ಕಾಗುಣಿತ 'ಹಾಡಿ' ತೊರಿಸಿದ್ದು. ಅದಕ್ಕೂ ಅ ಆ ಇ ಈ ಸ್ವರಗಳಿಗೂ ಇರುವ ಸಾಮ್ಯ ಗುರುತಿಸಿ ಬೇರೆಲ್ಲ ವ್ಯಂಜನಾಕ್ಷರಗಳಿಗೂ ಅದನ್ನ apply ಮಾಡಿದ್ದು ಈ ಚಿಲ್ಟೂನೇ, ಅದೂ ೨ ವರ್ಷ ತುಂಬುವ ಮುಂಚೆಯೇ! ಮಕ್ಕಳ beautiful, unbelievable mind ಬಗ್ಗೆ ನಿಮಗೆ ಗೊತ್ತಿದ್ದರೆ, ನೀವಿದನ್ನ ನಂಬ್ತೀರ..ನನಗೆ ಗೊತ್ತು.

ಮಳೆ ಹಾಡುಗಳು

2007-07-05T12:55:00.000-04:00

ಮಳೆ ಬಂತು ಮಳೆ, ಕೊಡೆ ಹಿಡಿದು ನಡೆ

ಜಾರಿ ಬಿದ್ದು ಆಯಿತು ಬಟ್ಟೆಯೆಲ್ಲ ಕೊಳೆ!

'ಮಳೆ ಬಂತು ಮಳೆ' ಹಾಡನ್ನ ನಾನು ಕಲಿತಿದ್ದು ಶಿಶುವಿಹಾರದಲ್ಲಿದ್ದಾಗ. ಈಗ ಹೀಗೆ ಮನೆಯಿಂದ, ಆಚೆ ಸುರಿಯೋ ಮಳೆ ನೋಡ್ತಾ ನಿಶು ಜೊತೆಗೆ ಈ ಹಾಡು ಹೇಳೋವಾಗ ಆಗ ಹಾಡಿದ್ದಾಗ ಆದಷ್ಟೇ ಖುಷಿ ಆಗ್ತಿದೆ.

7ನೇ ಕ್ಲಾಸ್ ತನಕ ಕನ್ನಡ ಮೀಡಿಯಂನಲ್ಲೇ ಓದುವ ಪುಣ್ಯ ನನಗಿತ್ತು. ಹೀಗಾಗಿ Englishಶುರುವಾಗಿದ್ದು 5ನೇ ಕ್ಲಾಸ್ನಿಂದ. A B C D, Apple, Banana.. ಜೊತೆಗೇ ಸ್ವಂತ ಆಸಕ್ತಿಯಿಂದ, ಮಕ್ಕಳಿಗೆ ಖುಷಿಯಾಗಲಿ ಅಂತ ದಾಸಪ್ಪ ಮೇಷ್ಟ್ರು ನಮಗೆಲ್ಲ ಒಂದಷ್ಟು rhymes ಹೇಳಿಕೊಟ್ಟಿದ್ರು. ಹಾಡನ್ನು ಅವರು ಅಭಿನಯಿಸಿ, ಚಿತ್ರ ತೋರಿಸಿ ಪ್ರೀತಿಯಿಂದ ಕಲಿಸುತ್ತಿದ್ದ ಬಗೆ ನನಗೆ ನೆನ್ನೆ ಕಂಡಷ್ಟೇ ಚೆನ್ನಾಗಿ ನೆನಪಿದೆ. ಅವರು ಕಲಿಸಿದ್ದ Rain, rain go away ಹಾಡಿನಿಂದಲೇ, ನನಗೆ English ಮೇಲೆ ಪ್ರೀತಿ ಹುಟ್ಟಿದ್ದು ಅಂತ ಕಾಣತ್ತೆ.

Rain, rain go away

Come again another day

Little johnny wants to play

Rain, rain go away.

ಕನ್ನಡದಲ್ಲಿ ಹೀಗೆ ಭಾವಾನುವಾದ ಮಾಡಿದ್ರೆ...

'ಬಾರೊ ಬಾರೊ ಮಳೆರಾಯ,

ಬಾರೊ ನಮ್ಮನೆ ತೋಟಕ್ಕೆ

ಈವತ್ತ್ ಬೇಡ ನಾಳೇಗ್ಬಾರೋ

ಈಗ್ ನಾನ್ ಹೋಗ್ಬೇಕ್ ಆಟಕ್ಕೆ.'

ಈಗ ಇಲ್ಲಿ ನಿಶು, ಕನ್ನಡ ಇಂಗ್ಲಿಷ್ ಎಲ್ಲ ಬೆರೆಸುತ್ತ, ಎರಡರಲ್ಲೂ ಒಟ್ಟೊಟ್ಟಿಗೆ ಮಾತನಾಡುತ್ತಾ ನಲಿಯುತ್ತಿದ್ದರೆ, ಈ ಮಗುವಿಗೆ ಇಂಗ್ಲಿಷ್ ಮಳೆಯ ಸೊಬಗು, ಕನ್ನಡ ಮಣ್ಣಿನ ಕಂಪು ಎರಡನ್ನೂ ಅನುಭವಿಸಲು ಸಾಧ್ಯವಾದೀತ, ಇನ್ನೂ ಯಾವ್ಯಾವ ಭಾಷೆಗಳ ಮಳೆಯಲ್ಲಿ ನೆನೆಯೋ ಸುಖ ಇವನಿಗೆ ಸಿಗಬಹುದು ಅಂತ ಅಂದುಕೊಳ್ಳುತ್ತಿದ್ದೇನೆ, ಹಾಗೇ ಸುಮ್ಮನೆ.

ಚಿತ್ರಗಳು: ಮೀರ

Humpty Dumpty ಮೊಟ್ಟೆರಾಯ

2007-06-11T12:20:00.000-04:00

Humpty Dumpty sat on a wall

Humpty Dumpty had a great fall

All the king's horses and all the king's men

Couldn't put Humpty Dumpty together again.

This is one of Nishu's favaourite rhymes. Here is an attempt to translate it to Kannada.

ನಿಶು ಈ ಹಾಡು ಹೇಳೋದು ಹೀಗೆ.....

ಚಿತ್ರಗಳು: ಮೀರ

ಇಲ್ಲಿಯವರೆಗೆ...........

2007-05-31T01:00:00.000-04:00

ಇಷ್ಟು ಬೇಗ ನಿಶೂಗೆ ಎರಡು ವರ್ಷ ಆಗಿಬಿಡ್ತಾ ಅಂತ ತುಂಬಾ ಜನ ಕೇಳ್ತಿದ್ದಾರೆ. ಈಗ ಒಮ್ಮೆ ಹಿಂತಿರುಗಿ ನೋಡಿದರೆ ನನಗೂ ಹಾಗೆ ಅನ್ನಿಸುತ್ತಿರೋದಾದ್ರೂ, ಇಲ್ಲಿಯವರೆಗಿನ ಈ ಕಾಲ ಓಡಿದ್ದೂ ಇಲ್ಲ, ತೆವಳಿದ್ದೂ ಇಲ್ಲ - ಸರಿಯಾದ ಗತಿಯಲ್ಲೇ ಸಾಗುತ್ತಿತ್ತು. ನಿಶುವಿನ ಮೂಲಕ ನನ್ನ ಸುತ್ತಲಿನ ಎಲ್ಲವನ್ನೂ ಮತ್ತೆ ಹೊಸ ಕಣ್ಣುಗಳಿಂದ ನೋಡೋ ಅವಕಾಶ ನನಗೆ ಸಿಕ್ಕಿರೋದು, parenting-ನಿಂದ ನನಗೊದಗಿದ ಸಂತೋಷಗಳಲ್ಲಿ ಒಂದು. ಮೇ ೨೦೦೫ರಿಂದ(ಅದಕ್ಕೂ ೯ ತಿಂಗಳ ಮುಂಚಿನಿಂದ) ಇಲ್ಲಿಯವರೆಗಿನ ನನ್ನ, ನಿಶುವಿನ ಒಡನಾಟ ನನ್ನಲ್ಲಿ ಪ್ರತಿದಿನ ಹೊಸ ಅರಿವು, ಅಚ್ಚರಿ, ಉಲ್ಲಾಸಗಳನ್ನ ತುಂಬಿ, ನಾಳೆ ಬರಬಹುದಾದ ಹೊಸ ವಿಸ್ಮಯಗಳಿಗಾಗಿ ಕಾಯೋ ಹಾಗೆ ಮಾಡಿದೆ. ಅಮ್ಮನಾಗಿದ್ದಕ್ಕೆ ಬಂದಿರೋ ಎಲ್ಲಾ ಹೊಸ ಜವಾಬ್ದಾರಿಗಳು, ಹೊಸ ಸವಾಲುಗಳು ಕೂಡ ನನ್ನಲ್ಲಿ ಸಹನೆ, ಸ್ಪೂರ್ತಿ ಹೆಚ್ಚೋ ಹಾಗೇ ಮಾಡ್ತಿರೋದಕ್ಕೆ ನನಗೆ ನಾನೆ thanks ಹೇಳಿಕೊಳ್ಳುತ್ತಾ.................

I am 2 now!!!

2007-05-26T00:07:00.000-04:00

2007-05-23T21:04:00.000-04:00

Hello.....it's me again...........did you miss me?

ನವಂಬರ್ ಆದ್ಮೇಲೆ ಸಿಗೋಣ ಅಂತ ಹೇಳಿದ್ನೇ ಹೊರ್ತು ಯಾವಾಗ ಅಂತ ಹೇಳಿರ್ಲಿಲ್ವಲ್ಲ' ಅಂತ ಹೇಳಿ ನುಣಿಚಿಕೋಳ್ಳೋಣ ಅಂದುಕೊಳ್ತಿದ್ದೆ. ಇಷ್ಟು ದಿನ ಬ್ಲಾಗ್ ಮುಂದುವರಿಸದೆ ಇದ್ದಿದ್ದಕ್ಕೆ ಅದೊಂದೆ ಕಾರಣ ಇದ್ದಿದ್ದು. ಈಗ ಮತ್ತೆ ನಿಶು, ನಾನು ಇಬ್ರೂ ಇಲ್ಲಿ ಬಂದಿದೀವಿ. 'ನಿಶು ಮನೆ ಬಾಗಿಲು ಯಾವಾಗ ತೆಗಿತೀಯ' ಅಂತ ಕೇಳ್ತಾ ಬಾಗಿಲು ಮತ್ತೆ ತೆರೆಯೋ ಹಾಗೆ ಮಾಡಿದ ಎಲ್ರಿಗೂ ತುಂಬಾ ತುಂಬಾ ಥ್ಯಾಂಕ್ಸ್. ಹೀಗೇ ಬರ್ತಾ ಇರಿ.

ಮ. ಮಾ.(!): ನಾಳೆ(May 26th) ನಿಶೂಗೆ ಎರಡು ವರ್ಷ ತುಂಬತ್ತೆ.

TAKING A BREAK

2006-10-31T00:18:00.000-05:00

Since Nishu is having a blast in India with his amma and appa, he is taking a break from Nishu mane for some time and will be joining you all after November. Thank you and have fun.

February, 2006

2006-10-16T01:02:00.000-04:00

ಹಕ್ಕಿ ಹಿಡ್ಯೋದು ಹ್ಯಾಗೆ ಗೊತ್ತಾ?

ಹೀ......ಗೆ!

ಗೊತ್ತಾಯ್ತಾ?

January, 2006

2006-10-16T00:53:00.000-04:00

ನಂಗೀಗ ಕೂತ್ಕೊಳ್ಳೋಕೆ ಬರತ್ತೆ, ಗೊತ್ತಾ?..................................completed 7 months.

December, 2005

2006-10-16T00:38:00.000-04:00

Cu......rious

November, 2005

2006-10-06T16:58:00.000-04:00

ಮೈ ಕೊರೆಯಿಸೋ ಬಾಸ್ಟನ್-ನ ಶಿಶಿರವೂ, ವಸಂತ ಎನಿಸಿದ್ದಕ್ಕೆ ಕಾರಣ.......ನೀನೇನಾ?

October, 2005

2006-10-05T11:38:00.000-04:00

ಇದಾವ ರಾಗ? ಇದಾವ ಹಾಡು?
ಇದಾವ ಭಾವ?
ನನ್ನ ಪುಟ್ಟ ಪುರಂದರ ವಿಠಲ..............

September,2005

2006-09-29T23:09:00.000-04:00

Me and my best buddy..........sep 22nd, 2005.........ಮೂರೂವರೆ ತಿಂಗಳೂ ತುಂಬಿದ್ದಾಯ್ತು.

August, 2005

2006-09-28T13:38:00.000-04:00

ಇಷ್ಟು ನಕ್ರೆ ಸಾಕ?...............Aug 14, 2005.......ಈಗಿವನು ಎರಡು ತಿಂಗಳ ಕಂದ

July, 2005

2006-09-28T13:31:00.000-04:00

ಇಷ್ಟಿಷ್ಟೇ ನಗು..............July 13, 2005.. Nishu is now a month old

ಹೇಗಿದ್ದ ಹೇಗಾದ - ೨- June, 2005

2006-09-28T13:12:00.000-04:00

ಸಿಹಿ ಸಿಹಿ ನಿದ್ದೆ............June 10, 2005 when Nishu was just 15 days old.

ನಂಗೆ ಅಳೋಕ್ಕೂ ಬರತ್ತೆ

2006-09-25T01:31:00.000-04:00

Few of my friends complain that I always show them the happy , smiling pics of Nishu hiding all his bad moments from them. I have to confess that usually he will be in a good mood when I have camera in my hand (or vise versa?). Still I managed to take these 2 pics , one in Jan and the other one in March 2006 when he was crying and just finished crying. Doesn't he look cute anyway?

ಬರೀ ನಗ್ತಾ ಇರೋ ನಿಶು ಫೋಟೋಗಳ್ನೇ ತೋರಿಸ್ತೀಯ ನಮ್ಗೆ ಅಂತ complaint ಮಾಡೋವ್ರಿಗೆಲ್ಲಾ ತೋರಿಸೋಕ್ಕೆ ಎರಡೇ ಎರಡು ಅಳೋ ಚಿತ್ರಗಳು- ನಿಶೂದು. ಜೊತೆಗೆ ಕನ್ನಡದ ಜಾನಪದ ಕಣಜದಿಂದ ಆಯ್ದ ಮೂರು ಮುತ್ತುಗಳು - ಅಳುವಾಗಲೂ ಮುದ್ದು ಸುರಿಯುವಂತೆ ಮಾಡೊ ಮ್ಯಾಜಿಕ್ ಗೊತ್ತಿರೋ ಎಲ್ಲ ಕಂದಮ್ಮಗಳಿಗೂ........

ಅಳುವ ಕಂದನ ತುಟಿಯು ಹವಳಾದ ಕುಡಿ ಹಂಗೆ
ಕುಡಿ ಹುಬ್ಬು ಬೇವೀನ ಎಸಳ್ಹಂಗೆ ಕಣ್ಣೋಟ
ಶಿವನ ಕೈಯಲುಗು ಹೊಳೆದಂಗೆ........

ಅತ್ತಾರೆ ಅಳಲವ್ವ ಈ ಕೂಸು ನಮಗಿರಲಿ
ಕೆಟ್ಟಾರೆ ಕೆಡಲಿ ಮನೆಗೆಲಸ ಹೊರೆಗೆಲಸ
ಮಕ್ಕಳಿರಲವ್ವ ನಿನ್ನಂಥಾ..........

ಯಾಕಳುವೆ ಎಲೆ ರಂಗ ಬೇಕಾದ್ದು ನಿನಗೇನು
ನಾಕೆಮ್ಮೆ ಕರೆದ ನೊರೆಹಾಲು ಸಕ್ಕರೆ
ನೀ ಕೇಳಿದಾಗೆಲ್ಲ ಕೊಡುವೇನೂ...........

ಈ ಹಾಡುಗಳ ಜೊತೆಗೇ ಅಣ್ಣಾವ್ರು ಕಾಮನ ಬಿಲ್ಲು-ನಲ್ಲಿ ಹಾಡಿದ್ದ ಹಾಡಿನ ಎರಡು ಸಾಲು ನೆನೆಪಿಗೆ ಬರ್ತಿದೆ. ಮರೆತು ಹೋಗೋ ಮುಂಚೆ ನಿಮ್ಮ ಜೊತೆ ಹಂಚಿಕೊಂಡು ಬಿಡ್ತೀನಿ.

`ನಕ್ಕಾಗ ಬೆಳದಿಂಗಳಂತೆ, ನೀನು ಅತ್ತಾಗ ಸಂಗೀತವು'........

ಹೇಗಿದ್ದ ಹೇಗಾದ ಗೊತ್ತಾ.....ನಮ್ಮ ಚಿನ್ನಾರಿ ಮುತ್ತ? - Evolution

2006-09-06T20:41:00.000-04:00

May 26, 2005- ಡೆಲಿವರಿ ರೂಮಿನಲ್ಲಿ ಮಂಚದ ಮೇಲೆ ಮಲಗಿದ್ದ ನಾನು ಡಾಕ್ಟರ್-ಗೆ ಹೇಳ್ತಾ ಇದ್ದೆ, ನಿಶಾಂತ್ ಅಂದ್ರೆ ನಮ್ಮ ಭಾಷೇಲಿ ಬೆಳಗಿನ ಜಾವ ಅನ್ನೊ ಅರ್ಥ ಇದೆ ಅಂತ. ಹಾಗೆ ಹೇಳ್ತಾ ನಿಶುಗೆ ಸ್ವಾಗತ ಹೇಳೋಕೆ ನಾನು, ಭಾರ್ಗವ ಸಿದ್ಧ ಆಗ್ತಿದ್ದಿದ್ದು ಮಾತ್ರ ರಾತ್ರಿ ೧೦:೪೫ರ ಸುಮಾರಿನಲ್ಲಿ. ೧೦:೫೭ಕ್ಕೆ ಈ ಜೀವಂತ ಗೊಂಬೆ ಅಷ್ಟೇನೂ ಸದ್ದೇಮಾಡದೆ(ಶಾಸ್ತ್ರಕ್ಕೆ ಎನಿಸುವಂತೆ ಅತ್ತ ಹಾಗೆ ಮಾಡಿ) ನನ್ನ ಪಕ್ಕಕ್ಕೆ ಬಂತು. ಮೊಟ್ಟ ಮೊದಲಿಗೆ ನಿಶುಮರಿಯ ಕೆನ್ನೆ ಸವರಿದ ಕ್ರೆಡಿಟ್ ಇವನಿಗೇ ಬಿಟ್ಟುಕೊಟ್ಟಿದ್ದು ಯಾಕಂದ್ರೆ, ಅಷ್ಟು ದಿನ ಈ ಚಿನ್ನಮರಿಯನ್ನ ನನ್ನೊಳಗೇ ಇಟ್ಕೊಳ್ಳೋ ಖುಷಿ ನನಗೇ ಸಿಕ್ಕಿತ್ತಲ್ಲ ಅಂತ.

This is one of the first few photos of Nishu when he arrived and watched with astonishment (it seemed so). He looked so sweet, so fresh and so dependent....I just couldn't hold my tears back. Bhargav was so much with me to share this moment and much more.

B or 8 or both? ಜಿಙ್ಞಾಸೆ

2006-09-06T20:24:00.000-04:00

Nishu loves his books. I took this photo on Oct.12, 2005 when he was 4 months old. He started turning the pages of his books when he was barely 3 month old.
2 days back he showed me 'B' from his alphabet book and said 'B' and then pausing a moment he pointed it again with his index finger and said 'aayt' which means 8 in his language. There again I had one more proud and unbeleivable moment.

ಎರಡು ದಿನಗಳ ಹಿಂದೆ ನಿಶು, ಅವನ ಬೋರ್ಡ್ ಬುಕ್-ನಲ್ಲಿ ಇಂಗ್ಲೀಶಿನ B ತೋರಿಸಿ `ಬಿ' ಅಂತ ಹೇಳಿದ. ಈಗಾಗಲೇ ಅವನು ಕೆಲವುಅಕ್ಷರ, ಅಂಕಿಗಳನ್ನ ಗುರುತಿಸೋದು, ಹೇಳೋದು(ಸಾಕಷ್ಟು ಸಲ ಸರಿಯಾಗಿ, ಎಲ್ಲೋ ಒಮ್ಮೊಮ್ಮೆ ತಪ್ಪಾಗಿ)ಮಾಡುತ್ತಿರೋದ್ರಿಂದ ಅದು ವಿಶೇಷ ಅನ್ನಿಸಲಿಲ್ಲ. ವಿಶೇಷ ಅನ್ನಿಸಿದ್ದು, ಅವನು ಮರುಕ್ಷಣ ಮತ್ತೆ B ಮೇಲೆ ತನ್ನ ಬೆಟ್ಟಿಟ್ಟು `ಆಯ್ಟ್'(ಅವನ ಭಾಷೇಲಿ ಅದು eight-8) ಅಂತ ಹೇಳಿದಾಗ.
ಮೇಲಿನ ಫೋಟೊ ಹೋದ ವರ್ಷ ಅಕ್ಟೋಬರ್ ೧೨ರಂದು ತೆಗೆದಿದ್ದು. ಆಗಿನ್ನೂ ನಿಶು ೪ ತಿಂಗಳ ಹಸುಗೂಸು.

2006-09-06T16:47:00.000-04:00

ನಾನು, ನನ್ ವಿಷ್ಯ.....

ನನ್ ಹೆಸ್ರು ನಿಶಾಂತ್ ಅಂತ. ನಮ್ಮನೆ ಇರೋದು ಬಾಸ್ಟನ್-ನಲ್ಲಿ. ಮನೇಲಿರೋದು ಅಪ್ಪ, ಅಮ್ಮ, ನಾನು ಮೂರೇ ಜನ. ಉಳಿದಂತೆ ನಮ್ಮ ಮನೆಯವ್ರೆಲ್ಲ ಇರೋದು..ಅಂದ್ರೆ, ತಾತ, ಅಜ್ಜಿ, ಮಾವ, ಅತ್ತೆ, ದೊಡ್ಡಪ್ಪ, ದೊಡ್ಡಮ್ಮ, ಅಣ್ಣ, ಅಕ್ಕ,.....ಎಲ್ರೂ ಇರೋದು ಇಂಡಿಯಾ-ದಲ್ಲಿ. ಇವರಷ್ಟೇ ಅಲ್ಲ, ನಮ್ಮ
ಸ್ನೇಹಿತರು, ಗುರುತಿರುವವ್ರೂ, ಗುರುತಿಲ್ಲದವ್ರು, ಅವ್ರು,ಇವ್ರು ಎಲ್ಲ್ರೂ ನನ್ನ ಫೋಟೋಗಳ್ನ ಆಗಾಗ ನೋಡೋದಕ್ಕೆ ಮತ್ತೆ ನನ್ನ activities ಎಲ್ಲಾ ಅಗಾಗ ಅವ್ರಿಗೆ ತಿಳಿಸೋದಕ್ಕೆ ಅಂತ ಅಮ್ಮ ಈ ಬ್ಲಾಗ್ ಮಾಡಿದಾಳೆ. ನಾನು(!), ಅಮ್ಮ ಇಬ್ರೂ ಅಗಾಗ ಇಲ್ಲಿ ಬಂದು ಅದೂ ಇದೂ ಹರಟ್ತಾ ಇರ್ತೀವಿ. ಈಗ ಸದ್ಯಕ್ಕೆ ಇಷ್ಟು ಸಾಕು. ಯಾ.........ಕಂದ್ರೆ,ನಂಗೆ ನಿದ್ದೆ ಬರ್ತಿದೆ....ಹೋಗ್ಬೇಕು. ನ್ಯಾಪ್ ಟೈಮ್! ಆಮೇಲೆ ಸಿಗ್ತೀನಿ, ಓ.ಕೆ? ಬಾಯ್.......

Hello........

2006-09-06T16:34:00.000-04:00

ನಿಶು ಅಂದ್ರೆ ನಾನೆ.............

Hi, It's me....Nishanth. My 'amma' and 'appa' calls me 'Nishu'. Amma says, I am the cutest baby in the whole world and Appa agrees. They really brags about me.....a lot. Wait and see!

Welcome

2006-09-06T02:04:00.000-04:00

Hi all,

welcome to Nishu mane!
Nishu is my 15 month old son. This is his 'mane', which means 'home' in 'kannada'- the sweet language that we speak at home.

Initially I thougt of making this blog entirely in kannada but then decided to do it in both Kannada and English. I would like to share my Nishu's pics and activities along with my thoughts with all who visit here. (Beware of the bragging!) I will appreciate your feedbacks in advance and hope you will enjoy it.